GILUBONG na ang 16-anyos nga si Christine Lee Silawan sa Sabado, Marso 23, dul-an duha ka semana human mapalgi ang iyang lawas niadtong Marso 11 sa buntag.
Usa ka misa requiem nga gipangulohan ni Fr. Johndy Enanoria ang gipahigayon sa Sto. Niño de Cebu-Mactan Parish sa wa pa gilubong sa hingpit ang dalaga sa Cattleya Gardens and Memorial Park sa lungsod sa Cordova.
Sa iyang wali, gipahinumdoman ni Enanoria ang banayng Silawan sa kamahinungdanon sa pag-move on sa nadangatan sa dalaga, apan magpabiling mag-ampo ug padayon usab nga mangayo og hustisya alang sa iyang kamatayon.
Moabot sa 5,000 ka mga tawo ang gibana-bana sa kapulisan nga mihatod sa haya ni Christine Lee gikan sa simbahan paingon na sa menteryo diin siya gilubong.
Gawas sa mga kabanay ug kaila sa banayng Silawan, ningsimptaiya kanila mao si Lapu-Lapu City Mayor Paz Radaza ug Bise Mayor Marcial Ycong.
Nihatod usab sa lubong ang chairman sa Volunteers against Crime and Corruption (VACC) nga si Dante Jimenez ug ang bantugang director, Carlo J. Caparas.
Pipila sa mga mihatod sa patayng lawas ni Christine Lee nagsuot og mga t-shirt nga puti nga may printang “Justice for Christine Lee Silawan. We will miss you so much”.
Moabot sa 25 ka mga electric jeepney (E-Jeep) ug 10 ka mga bus sa barangay ang gipadagan sa Kagamhanan sa Dakbayan sa Lapu-Lapu nga maoy gisakyan sa mga mihatod.
Sa simbahan pa lang diriyot na makuyapi si Lourdes, inahan ni Christine Lee, ug hinilak samtang nagpadayon ang santos nga misa samtang nagsud-ong sa lungon sa iyang anak.
Kapila usab kini gitabang sud sa sementeryo samtang nagpadayon ang final blessing sa lawas.
Si Teresita Amora, taga lungsod sa Cordova, nituyo paghatod sa katapusang kapahulayan sa dalaga sanglit gibati siya og kaluoy sa nadangatan niini lakip na sa pamilyang Silawan.
“Brutal ra gyud kaayo ang gabuhat ana oi. Mas maayo madakpan ang suspek. Kon akong anak pa na, sus,” matod ni Amora. Nagdumili na pagpa-interview si Lourdes human sa lubong sa iyang anak.
Apan ang igsuon niining si Fermina nagpasalamat og dako sa suporta nga nadawat sa ilang pamilya gikan sa pagsugod pa sa haya sa iyang pag-umangkon hangtod nga nalubong na.
Ang paglubong naatol usab sa ika-48 nga adlaw nga natawhan ni Lourdes.