ANG Lapu-Lapu City Prosecutor’s Office nimando sa pagpagawas sa 17-anyos nga suspek sa pagpatay kang Christine Lee Silawan.
Sa usa ka resolution nga giluwatan niadtong Marso 22, ang mga prosecutor nga nagkupot sa kaso nimando sa Lapu-Lapu City Social Welfare Office sa pagpagawas sa 17-anyos nga suspek gikan sa ilang custody.
Ilang gitumbok nga ang warrantless arrest nga gihimo sa National Bureau of Investigation (NBI) 7 niadtong Marso 16 imbalido.
Tungod kay imbalido ang pagdakop, ang Lapu-Lapu City Prosecutor’s Office niundang sa inquest proceedings batok sa suspek ug nipaubos kaniya sa regular preliminary investigation.
Si manlalaban Vincent Isles, kinsa, maoy abogado sa 17-anyos, nikompirmar nga ang iyang kliyente gibuhian gikan sa kustodiya sa local social welfare office sa Sabado sa udto, pipila ka mga oras sa wa pa gilubong si Silawan.
Giuyonan sab sa mga prosecutor ang petisyon ni Isles nga tugtan ang iyang kliyente sa pagduso sa counter-affidavit isip tubag sa kaso nga gipasaka sa NBI 7 batok kaniya.
Matod ni Isles nga pinaagi niini, ang iyang kliyente duna nay kahigayunan sa pagpresentar sa testimoniya sa iyang mga saksi aron mokompirmar sa mga alegasyon batok kaniya, matod ni Isles.
Sa pagkakaron, ang 17-anyos nagpuyo sa usa ka luwas nga dapit.
Alang kang Isles, ang hukom sa mga prosecutor usa ka tikang sa pag-angkon og hustisya sa iyang kliyente.
“In a sense, this is a victory for my client, but it is also a victory for the rule of law,” sulti ni Isles sa SunStar Cebu.
Sa miaging semana, si Isles niduso og omnibus motion sa Lapu-Lapu City Prosecutor’s Office, nga naghangyo sa buhatan sa pagpagawas sa iyang kliyente tungod sa iyang giingon nga ilegal ang warrantless arrest sa NBI 7.
Si Isles nitumbok sa hukom sa Supreme Court, ug niingon nga ang NBI 7 way personal knowledge ug wa say saksi nga nakakita aron pagmatuod nga ang iyang kliyente personal nga nipatay kang Silawan sa Barangay Bankal sa gabii sa Marso 10.
WA KAHIBAWO
Gipadayag ni Fermina Silawan-Garcia, iyaan ni Christine Lee Silawan, nga wa pa sila masayod ning uwahing kalamboan. Si Fermina nakurat dihang nahisayran ang balita atol sa lubong sa iyang pag-umangkon.
Wa niya kalikayi nga makapangutana kon nganong nahitabo kini.
“Ambot lang ana oi, nganong in-ana man. Wa gyud mi idea pa kay naa pa mi sa kasub-anan,” matod ni Fermina.
Ang inahan ni Christine Lee nga si Lourdes wa usab mokomentaryo sa naasoyng taho dihang gisuwayan og kuha sa iyang habig sa mga tigbalita.
Di siya gustong mosulti sanglit padayon pa silang nagbangutan sa nadangatan sa iyang anak nga gilubong na kagahapong adlawa.
Si Lapu-Lapu City Mayor Paz Radaza, sa iyang bahin, nipasabot nga kon ugaling tinuod ang mando sa prosecutors sa pagbuhi na sa 17-anyos nga suspek ubos sa kustodiya sa City Social Welfare Development Office (CSWDO), wa na silay mahimo sanglit igo ra sila mosunod sa proseso sa balaod.
Ang 17-anyos gipahimutang kaniadto sa kustodiya sa Homecare Center nga iya sa Dakbayan sa Lapu-Lapu sanglit usa man kini ka menor.
Nagdumili na hinuon paghatag ang mayor sa iyang opinyon kalabot sa posibleng implikasyon niini sa pagkab-ot sa tiunay nga hustisya sa kamatayon ni Christine Lee.
Iyang gisalig ang tanan sa mga awtoridad ang pagsulbad niini.
Ang administrasyong Radaza nagtanyag og P1M sa makatudlo sa killer nga makapakombikto niini sa hukmanan.
NAKAPANGUTANA
Ang chairman sa Volunteers Against Crime and Corrpution (VACC), Dante Jimenez, niingon nga ang pagpabuhi sa kustodiya sa 17-anyos nagpakita lang nga gidali-dali sa mga awtoridad ang pag-file sa kaso batok sa suspek ug wa na mosubay sa insaktong proseso.
Di pa hinuon uwahi ang tanan sa mga awtoridad sa paghimo og lakang nga magmatuod ug mas molig-on ang ilang kaso batok sa 17-anyos ug uban pang suspek nga posibleng adunay kalabotan sa linuog nga pagpatay ni Christine Lee.
“Bakit ganun pumapalpak yung ano fi-nile na complaint. Either way, hindi talaga ayos, inaapura. Haste makes waste,” matod ni Jimenez.
Bisan ang Public Attorney's Office (PAO) mopahigayon og ilang kaugalingong imbestigasyon.
Ilang nakita nga gidali-dali sa NBI ang pagpasaka og kaso batok sa suspek bisan kuwang ang mga ebidensya.
Si NBI 7 Regional Director Tomas Enrile nanghimakak niini.
Matod ni Enrile nga sa wa pa nila gipasaka ang kaso batok sa suspek, duna na silay igong mga ebidensya batok sa menor de edad.
Alang kaniya makalawgaw na hinuon kini sa kaso.
Si Police Regional Office (PRO) 7 Director Debold Sinas, sa iyang bahin, niingon nga di makaapekto sa kaso ang hukom sa prosecutors.
Karon nga gibuhian na ang suspek, ilang sundon ang naandan nga pagpasaka sa kaso.
Ang pamilya sa 17-anyos nga suspek dihang gibisita ning mantalaan mihangop sa pagbuhi sanglit alang kanila wa kini sala.
Wa hinuon ang inahan sa suspek sa pinuy-anan niini dihang gibisita ning mantalaan sanglit adunay matod pa importante nga gilakaw sukad pa kagahapon sa buntag. (dugang taho ni AYB)