DUHA ang patay sa managlahing insidente sa pagpamusil sa dakbayan sa Talisay, Biyernes ug Sabado, Marso 22 ug 23.
Patay nang napalgan si Maria Frelyn Dela Rita Agdon, 44, residente sa Upper Riverside, Zone 2, Barangay Dumlog, Talisay pag Sabado sa buntag, Marso 23.
Gipusil kini sa wala pa mailhi nga mamumuno alas 8:10 sa buntag sa naasoy nga dapit.
Gitabang pa ang biktima sa Talisay Rescue and Emergency Assistance Team (TREAT) apan wala na kini masalbar.
Nasayran nga naglakaw ang maong biktima sa maong lugar kinsa aduna’y gipapirmahan sa ilahang organisasyon may labot sa urban poor.
Kalit lang kini giduol sa suspek nga nagbonnet ug gipusil si Agdon sa buko-buko.
Gitino pa ang posibleng motibo kabahin sa insidente.
Samtang patay ang usa ka 19-anyos nga lalake human kini gipusil usab sa riding-in-tandem sa Sitio Canipaan, Barangay Pooc, Talisay, Biyernes sa gabii, Marso 22.
Naila ang biktima nga si Jojie Evangelio, kinsa residente sa Sitio Tabay, Barangay Pooc, dakbayan sa Talisay.
Nasayran nga aduna’y kainom ang biktima atol sa maong insidente dihang kalit lang nga niabot ang tulo ka mga lalaki sakay ang duha ka motorsiklo.
Gipauwanan sa bala ang biktima hinungdan sa iyang kamatayon.
Wala ra naunsa ang iyahang kauban samtang wala pa masuta ang motibo sa maong pagpatay. (HBL)