USA ka tinun-an sa Grade 11 sa Gothong National High School (GNHS) sa dalan C. Padilla sa dakbayan sa Sugbo ang nasikop sa buy-bust sa Regional Special Operations Group (RSOG) 7 pasado alas 4:00 sa hapon sa Dominggo, Marso 24, sa B. Aranas Extension, Barangay San Nicolas Proper ning samang dakbayan.
Ang batan-ong suspek giila nga si Michael David Marzon de Gracia, 18, taga Sitio Mansanitas, Barangay Duljo Fatima.
Nakuha gikan kaniya ang usa ka kilo nga gituohang shabu nga mobalor kini og P6.8 milyunes base sa Dangerous Drugs Board (DDB) street value.
Si Chief Insp. Ricardo Tero, hepe sa RSOG7, nagkanayon nga nalakip sa high value target ang dinakpan nga si De Gracia human nilutaw ang iyang pangalan nga maoy tig-supply sa ilegal nga drugas base sa pagsusi sa ilang unang mga dinakpan ug monitoring.
Atol sa anti-drug operation, giingong nisuway pagpusil ang dinakpan sa mga pulis nga hinungdan nga giunhan nila kini pagpusil nga niresulta sa pagkaigo sa iyang paa.
Apan, hugot nga gihimakak ni De Gracia ang alegasyon sa kapulisan sa dihang nahinabi sa Superbalita Cebu.
“Dili man to akoa, ambot kinsa kaha nang shabu kay wala man ko magdala ana,” matod ni de Gracia.
Dugang niya nga human masunog ilang balay sa Sitio Mansanitas sa Duljo sa nilabayng tuig, mag-anhaan na siya sa dalan B. Aranas.
Gihimakak usab niya nga mogamit siya og illegal nga druga ug nihagit nga ipa-drug test pa siya.
Apan ang kapulisan nitumbok gyud kang De Gracia nga ilang napalitan sa druga ug dili mahimo nga sayop siya kay gipaubos nila kini sa surveillance sud sa tulo ngadto sa upat ka semana.
Gawas sa usa ka dakong putos sa shabu, nakuha usab gikan kaniya ang usa ka calibre .38 ug mga bala niini nga maoy iyang gisuway pagpusil sa mga pulis.
Si Kapitan Clifford Niñal sa Barangay San Nicolas Proper nga nahinabi sa Superbalita Cebu nagkanayon nga kasagaran sa mga nalambigit sa ilegal nga drugas sa Duljo didto sa iyang barangay motabok.
Tungod niini, gipahugtan pa niya ang pag-monitor niining mga durugista pinaagi sa iyang mga barangay tanod.
Niabag sa buy-bust ang kapulisan sa Sawang ug barangay tanod sa San Nicolas Proper.
Sa dihang nakabantay nga pulis ang iyang nabaligyaan, kalit nipadagan si De Gracia sa iyang E-Bike. Apan, naabtan kini sa mga pulis ug iyang mga barangay tanod ug mihana pa kinig pusil.
“Diha sa among barangay naabtan gyud ni siya ambot diin kaha ni gikan sila. Pag dakop ani nasamdan pa gani to akong barangay tanod kay misuki man misukol bah, diha gyud nakuha sa iyang E-Bike ang drugs,” matod ni Niñal.
Iyang gidugang nga aron mapugngan ang pagkatap sa ilegal nga drugas sa iyang barangay, aduna nay mga CCTV camera ang ilang imontar sa mosunod nga mga buwan sa pipila dapit libot sa barangay.