Nadela: Ang tabo sa Mantalongon, Barili

TUNGOD sa grabing kagutom nihunong mi taliwala sa lawod sa mga tawo nga among naabtan sa Barangay Mantalongon sakop sa lungsod sa Barili habagatang Sugbo sa miaging Huwebes, Marso 21, usa ka dakong tabo ang among nasaksihan kauban sa akong higala nga si Demos Arsenio.

Pagtambal sa tumang kagutom ug kauhaw among gisum-ok ang mabagang duot sa mga tawo hangtod nga nasungko mi sa usa ka bahin nga medyo may pagka bakilid. “Kuatro otso lang ni Boss“ matod niadtong usa nga tungod sa kainit sa kabuntagon gipaningot nga nag guroy sa baboy.

Diha say babaye nga nipagawas sa ulo sa baboy gikan sa sako nga iyang gihawiran. “ Tan-awa sir guwapa kaayo. Para asal gyud ni.Kuatro lang ni. “Ang iyang gipasabot kuatro mil pisos. Kadtong nauna nitanyag nga niingon nga kuatro otso ang gipasabot niya kuatro mil otsosentos ang presyo sa iyang baboy.

Nipahiyom ko og nipasabot nga di mi mamalit og baboy nga aslonon. Ang among tuyo kaon kay hilab na kaayo among kuto kuto. Iya ming gitudloan nga adto mokaon niadtong kan-anan sa may suok nga bahin nga gikuninitan sa daghang kustomer.

Ang mga putahe naglakip sa gitagud nga litsong baboy nga himalitan kaayo. Akong giukab ang dakong kaldero og nialisngaw ang humot nga baho sa kalderetang kanding og ang laing kaldero ang paklay nga namungingi sa daghang lamas og sayoti. Duha ka takus nga kaldereta og duha ka takus nga paklay giparesan og duha ka plato nga kan-ong mais ang among gi-order. Way lalis makaadik ang templada sa duha ka sud-an nga among gi-order nga amo rang gikinamot.

Akong giingnan si Demos kong di pa lang unta layo ang among biyahe nindot nga magpa putos para sa balay. Samtang nagpaabot ko sa sukli sa akong gibayad akong gikailaila ang tag-iya sa kan-anan nga mao ang magtiayong Ben ug Omie Ceboco.

Matod ni Ben dugay na silang naninda og pagkaon matag Huwebes bisan niadtong aktibo pa siya sa pagpangumpra og baboy ug baka nga iyang itumod sa iyang suki sa Carbon Market. Tuig 1989 nagsugod siya sa pagpangumpra og niundang pagka 2011. Wa siya nihatag og rason nganong niundang.

Iyang gihulagway nga di pa kaayo daghan ang supply sa baboy ug baka kaniadto. Apan sa dihang naundang ang tumod sa mga hayop sa Barangay Papan sa lungsod sa Sibonga, ang tabo sa Mantalongon na ang nahimong han-okanan sa mga hayop nga nag-gikan sa mga silingang lungsod og isla sa Negros.

“Pinaka dako na karon ang Mantalongon kong abutanan sa mga hayop ug kumprador ang hisgutan.” paambit ni Ben.

Iyang bana bana moabot sa singko mil ka baboy ug tresentos ka baka ang itumod matag Huwebes. Wa pa ni labot sa nilibo nga kanding ug manok nga himalitan sab kaayo. Siya niasoy nga ang maong gidaghanon mosaka pa sa matag bulan sa Disyembre ug Enero tungod sa kataas sa panginahanglan.

Sa dihang nanamilit nami ni Ben kadtong babaye nga nitanyag namo og aslonon didto pa gihapon sa iyang nahimutangan. Pero lain na og kolor ang baboy nga diha sa sud sa sako. “Diay bag-ong abot sir. Mas guwapa og dako ni sa ganina. Barato nalang. Madala ra ni og kuatro singko.”

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph