MOKABAT sa 25 porsento sa mga Pilipino gusto sa mga kandidato sa pagkasenador nga di mangurakot, sumala pa sa ulahing survey nga gihimo sa Social Weather Stations (SWS) gikan sa Disyembre 16 hangtod sa 19, 2018.
Sa samang survey, 22 porsento gusto sa mga kandidato nga dunay pagpakabana sa mga kabus, samtang 21 porsento gusto niadtong maayog kinaiya, manggihatagon, makiangayon ug responsable nga pagkatawo.
Gipakita usab sa maong survey nga 21 porsento sa mga Pilipino gusto sa mga kandidato nga kasaligan ug 20 porsento gusto sa mga kandidato nga matinabangon niadtong nanginahanglan og tabang.
***
Sa di pa kita mopadayon sa unahan, atong tukion ang maong survey bahin sa pangurakot. Ang giingon sa maong survey “senatorial bets who will not be corrupt,” di mangurakot kon makadaog isip senador ug makalingkod na sa puwesto.
Sa survey nga gihimo sa SWS gikan sa Disyembre 16 hangtod sa 19, 2018, nag-una sa una ug ikaduhang dapit ang mga reelectionists nga sila si Senador Cynthia Villar ug Grace Poe. Ang duha wa malambigit sa bisan unsang kaso sa pangurakot.
Apan sa samang survey tabla sa ikawalo ug ika-siyam nga dapit sila si Senador Koko Pimental ug kanhi Senador Jinggoy Estrada. Si Estrada nag-atubang og kasong plunder ug graft and corruption. Tingali lahi ang survey kon kinsay gusto ug kinsay botaran.
***
Sa survey kinsay gusto, 14 porsento sa mga Pilipino gusto sa mga kandidato sa pagkasenador nga motuman sa ilang mga saad, samtang 9 porsento gusto niadtong makahatag og solusyon sa mga problema sa nasod.
Adunay 7 porsento nga gusto niadtong sayon duolon, 6 porsento niadtong maayong lider, 5 porsento gusto niadtong maminaw sa mga tawo, laing 5 porsento gusto niadtong mutuo sa Ginoo, samtang tres porsento lang ang gusto sa edukado ug bright.
Mao kana nga modaog gihapon kadtong magsigi lang og saad apan di tumanon, kadtong sayon duolon apan lisod pangitaon. Kanang kandidato nga di mangurakot, morag pangandoy ra na.