USA ka mahuyang nga magtutudlo gipusil-patay luwan sa iyang motorsiklo sa national highway sa Barangay Malingin, lungsod sa Daan Bantayan, pasado alas 2:00 kagahapn sa kaadlawon.
Ang biktima mao si Adan Arcillas Mendrano, 28, molupyo sa dakbayan sa Bogo, nagtudlo sa sa Daan Bantayan National High School ug anak ni SPO4 Bibo Mendrano sa Bogo police station.
Ang biktima apan gipusil dihang nisukol sa wa pa mailhing tulisan. Naigo siya sa wang mata ug nilapos ang bala sa armas ngadto sa luyong parte sa iyang ulo hinungdan sa iyang nga kamatayon.
Nagtuo ang kapulisan nga usa ka .9mm nga pistola ang gigamit sa mamumuno tungod sa kabhang sa bala nga ilang nakuha gikan sa crime scene.
Si SPO3 Carlos Condino inbestigador sa kaso nga nahinabi sa Sun.Star Superbalita niingon nga gideklarar ni Dr. Nicomedes Jabel nga dead-on arrival (DOA) sa ospital sa lungsod.
Base sa kasayuran gikan Cebu Provincial Police Office (CPPO), si Mendrano nagmaneho sa iyang motorsiklo ug niangkas kaniya ang duha niya ka mga tinun-an nga sila si Jijari Pitogo ug Jake Sanchez.
Ang tulo gikan sa usa ka disko sa Sitio Kumbado, Barangay Bagay sa Daanbantayan.
Ang duha ka mga estudyante nibutyag nga padulong na unta sila sa Poblacion Proper sa maong lungsod dihang nakabantay sila nga adunay laing motorsiklo nga may sakay nga duha ka tawo ang nagsunod kanila.
Dihang niabot na sila sa atubangan sa Manlingin Elementary School sa barangay Manlingin, Daanbantayn, ni-over take ang nagsunod nga motorsiklo ug nihunong atubangan kanila hinungdan nga mihunong usab ang biktima sa pagmaneho sa iyang motorsiklo.
Nakurat nalang ang mga tinun-an ingon man ang maestro dihang nideklara og tulis ang duha ka wa mailhing tulisan ug niti-on ngadto kanila ug wa matino nga kalibre sa armas.
Sa kahadlok sa usa mga sakay sa biktima nga si Sanchez, dali niyang gitunol ngadto sa mga tulisan ang bag sa magtutudlo nga iyang gigunitan niadtong higayuna.
Apan matud ni Sanchez, gihulbot pag-usab sa magtutudlo ang iyang bag gikan sa usa sa mga tulisan hinungdan nga gipusil siya sa usa sa nagmaneho sa motorsiklo sa mga tulisan.
Ang kapulisan wa pay matumbok nga responsable sa pagpanulis ug pagpatay apan dako ang ilang pagtuo nga kaila ra sa biktima.
Si CPPO Director Senior Supt. Erson Digal niklaro nga tulis gayod ang motibo sa krimen ug wala nay lain pa nilang gitan-aw nga anggulo sa imbestigasyon.
“Klaro kaayo na nga tulis tingalig ibutang dayon nga dunay politika so wala gyud na nato gitan-aw.”pasabot ni Senior Supt. Digal.
Matod ni Digal, ang krimen way kalabotan sa sa nitumaw nga tensyon sa pulitika sa Daanbantayan.
Usa sa gisusi karon sa kapulisan mao ang pagpatawag sa giingong kanhi uyab sa biktima.
u2018Kini kunong suspek didto palang ni sa diskohan nakit-an naning daan pero walay nakaila mistesuhon man kuno ning tawhana kay bisan sa pag tulis na wala man gyud ni magtaptap sa nawong so kadtong duha ka kuyog nakakita gyod,”matod ni SPO3 Condino.
Hinuon, wala nila isalikway ang posebilidad nga kaila ra sa biktima ang tulisan ug mao kini karon ang ilang gisusi.
“Kay pagtulis gud gikua niyag balik ang bag morag iya paman ning gigakos unya duna siyay morag gibanggit nga pangan so morag nakaila ni siya,”dugang ni SPO3 Condino. (DRT/ ADL-USJ-R Media Intern)