DILI palang dugay ang Metro Manila nagka-krisis sa tinubdan sa tubig, maayo nalang kay nakabaton kita’g presidente nga kon dunay problema nga makaapekto sa adlaw-adlaw nga panginahanglan sa tawo, dili mag-urong ug dili unya-unyaon, aksiyonan dayon.
Kini miresulta sa pagpatawag sa tagdumala sa Metropolitan Waterworks and Sewerage System (MWSS) diin gisabonan ug giwaswasan pag-yo.
Wala madugay nahibalik ang supply sa tubig, gani, ang pagtuo sa mga tigpaniid buot sabotahion sa mga kaaway sa politika sa atong presidente ang iyang administrasyon; aron kini madaut sanglit election season karong panahona tuod man, sulbad gilayon ang dakong problema.
Dinhi sa atong dakbayan sa Davao, nag-alarma na ang Davao City Water District (DCWD) nga bisan supesiyente kita og supply sa tubig, apan dili kita mag-usik-usik ug atong ampingan ang tinubdan sa tubig, dili ka’y sa ato lang panahon karon, kon dili sa atong umabot pa nga henerasyon.
Pinaagi niini, magpasalamat kita sa Apo Agua, nga nakig Joint Venture sa DCWD aron ugmaron ang Tamugan ug Panigan rivers alang sa pag-supply og tubig sa atong siyudad, nga nag-anam na kita og kadaghan nga gumagamitay og tubig.
Gipasalamatan sab nato ang atong presidente, nga iya na kining gi-andam daan sa dihang mayor pa siya sa atong siyudad, ang pakiglambigit sa Apo Agua ug DCWD aron magmalampuson kining umaabot nga proyekto nga sa dili madugay sugdan na, pinaagi usab sa pagpaningkamot sa atong Mayor Sara Duterte-Carpio.
Human sa eleksiyon molingkod na usab ang atong umaabot nga Vice Mayor Sebastian “Baste” Duterte, ug manghinaut kita nga dunay mga resolusyon ang bag-ong miyembro sa konseho nga dili langay-langayon ang mga rekisitos nga gikinahanglan aron madali ug dili malangay ang pagtrabaho alang sa dugang tinubdan sa atong kunsumo sa tubig sa tibuok dakbayan sa Davao.
Ang atong populasyon karon ning siyudad gibana-banaan nga kapin sa duha ka milyon ug tunga, ug sa mga napulo ka tuig gikan karon, hayan moabot na ang populasyon sa siyudad ngadto sa upat ka milyon, busa kinahanglan ato na kining pangandaman.
Awhag lang nato ngadto sa atong mga lumolupyo sa siyudad nga dili gyud abusohon ang tinubdan sa atong tubig nga mao ang Panigan ug Tamugan rivers aron i-preserba sa atong umaabot nga kaliwat.
Suportahan nato ang DCWD Apo Agua, sa Aboitiz power Corporation ug JV Angeles nga magmalampuson sila sa pag-ugmad alang sa dugang tinubdan sa tubig sa Dakbayan sa Davao.
--oOo--
Paminawa ang programang “Kontra Balanse” sa dxOW 981 khz sa dial sa inyong mga radyo, matag alas 7:30 ngadto sa alas 9 sa buntag sa adlawng Lunes hangtud sa Sabado.