NALINGAW ang mga Dabawenyos sa gipahigayong Alveo Ironman 70.3 kagahapon, Marso 24, ug bisan nasinati ang pagguot sa trapiko kay gigamit ang mga nag-unang kadalanan sa programa misabot ang tanan ug nangalipay dihang nasaksihan ang grandiyuso nga paugnat sa kusog.
Gawas sa mga langyaw nga magduduwa nga midayo sa Davao City, nagbansiwag sab ang dagway sa mga nag-una ug sikat nga mga artista sa nasud sama nila Piolo Pascual, Zoren Legaspi, Bubbles Paraiso, Kuya Kim Atienza, ug daghan pa nga maoy starring sa selfie photo sa mga Dabawenyos.
Sa miaging tuig, susama sab niini ang nahitabo, lingaw ug bisan ang kainit sa panahon, wa igsapayan masaksihan lang ang pinasahe nga maong matang sa isports.
Tuod man, ang maong kalamposan, usa sab ka kalamposan sa turismo sa Davao City ug sa mga kasikbit nga probinsya sa dakbayan sama sa Island Garden City of Samal (Igacos) kay didto sagad nangatulog ang mga langyaw ug artista.
Sumala ni Davao City Tourism Operations Office head Generose Tecson nga misaka gayod ang turismo sa dakbayan gikan sa pagsugod sa maong tinuig nga programa niadtong miaging tuig ngari sa Davao City.
"Ang tourism industry is a fragmented industry. It’s not like a still company. It is composed of different sectors; we have the hotel industry, restaurants, tour operators, tour guides and transportation. Iba-iba sila but each one is dependent to another,” ingon ni Tecson.
Gawas sa programa sa IronMan mas misamot kadaghan ang mga bisita labi na sa mga dagkong programa sama sa Palarong Pambansa, National Private Schools Athletic Association (Prisaa), Kadayawan ug ubang aktibidad nga maoy nakapalapad sa turismo ning dakbayan.
"Maraming visitors na papasok, hindi nila kailangan ng hotel lang. Kailangan nila ng restaurant, transportation, or kailangan nila bumili ng souvenirs. Habang umaakyat ang number of tourists, mas marami ang nagbe-benefit,” niya pa.
Sa kalamposan sa IronMan 70.3 kagahapon, nagpakita lamang kini nga andam ang Davao City sa paggunit pa og mga dagkong programa gumikan makita sa siyudad ang padayong paglambo samtang nagdagan ang panahon.