KIDAPAWAN CITY - Nagkahiusa ang tanan nga mga kandidato sa probinsiya sa Cotabato sa tumong nga aron mas makab-ot pa ang hapsay ug malinawon nga piniliay karong bulan sa Mayo sa maong probinsya.
Kini dungan sa gipahigayon nga Grand Unity Walk ug Ride for Peace sulod sa kapitolyo sa North Cotabato sa Amas, Kidapawan City nga gipangunahan sa kapulisan, militar, nagkadaiyang sektor sa katilingban, ug sa lokal nga kagamhanan sa probinsya, kagahapon, Marso 24.
Tumong sa region-wide one time big time event sa nagkadaiyang dapit sa Region 12 nga “Ugnayan ng Simbahan at Pulis o USAP for Free, Credible and Peaceful Elections aron mapatunhay ang kalinaw atol sa piniliay nga maoy usa sa mga prayoridad.
Gibutyag ni Supt. Bernard Tayong, ang tigpamaba sa Cotabato Police Provincial Office, nga ang panagtagbo (Salubungan) sa Grand Unity Walk and ride for Peace, dungan nga gipahigayon sa General Santos City, Cotabato City, Koronadal City, Tacurong City ug sa siyudad sa Kidapawan.
Sa Kidapawan City, nanguna si North Cotabato Police Provincial Director S/Supt Maximo Layugan, Cotabato Governor Emmylou ”Lala” Mendoza, mga ahensiya sa gobyerno, religious groups, academe, transport groups, civic ug non-government organizations, NAMFREL, Commission on Elections lakip na ang mga kandidato.
Nakighiusa sab ang mga molupyo sa probinsiya sa Cotabato sa Grand Unity Walk and Ride for Peace diha sa Armas ground nga dunay kalabutan sa “Lakad Tungo sa Kapayapaan, Iwaksi ang Karahasan” nga nagkondena sa sunod-sunod nga pagpamomba sa nagkadaiyang dapit sa Mindanao.
Naghinatagay sab og bulak ang mga magkaatbang nga kandidato sa tibuok probinsiya sa Cotabato apil na ang paglagda sa peace covenant sa hapsay ug malinawon nga piniliay.