DATU ODIN SINSUAT, Maguindanao -- Nabugtuan sa kinabuhi ang usa kanhi lokal opisyal sa pagpamanhig alas 2:30 sa hapon niadtong adlaw nga Sabado, Marso 23, sa probinsiya sa Maguindanao.
Giila ang nakabsan sa kinabuhi nga mao si Ambel Guimadel, kanhi ABC President ug Municipal councilor sa Talitay Maguindanao diin samdan sab ang iyang asawa nga si Saida.
Gibutyag ni Maguindanao Police Provincial Director Ronald Briones nga sakay ang mga biktima sa motorsiklo gikan sa Talitay paingon sa Cotabato City.
Apan pag-abot sa magtiayon sa Barangay Taviran, Datu Odin Sinsuat Maguindanao kalit lang mibutho ang duha ka wala mailhing tawo ug gipamusil sila gamit ang kalibre .45 nga pistola.
Abtik sab nga miikyas ang mga namusil sakay sa usa ka Toyota pick-up nga walay plaka paingon sa hilit nga dapit sa Maguindanao.
Gisapupo ang magtiayon sa mga sakop sa kapulisan ug militar diin sila gidala sa Cotabato Regional and Medical Center (CRMC) sa Cotabato City apan gideklara nga dead on arrival si Ambel samtang grabe ang iyang asawa nga pulos naka-angkon og daghanang samad pinusilan sa nagkadaiyang parte sa ilang kalawasan.
Ang mga biktima sinaligan sa usa ka mayoralty candidate sa Talitay, Maguindanao.
Away sa politika ang gilantaw sa mga otoridad nga motibo sa pagpamusil sa magtiayon nga padayon nilang gi-imbestigahan. (Edgar Fuerzas)