PATAY nang napalgan ang usa ka 78-anyos nga lalaki Sabado sa buntag, Marso 23, didto sa Waterlily Street, Brgy. Wilfredo Aquino, Agdao District, dakbayan sa Davao.
Giila ang biktima nga usa ka alyas Mero, 78-anyos, residente sa maong lugar.
Nasayran nga bag-o pa nadiskubrehan ang patay nga lawas sa biktima. Nakit-an kini sa ilang silingan nga nakaluhod ug wala na nagalihok.
Gumikan kay nagduda na si alyas Dodoy, iyang silingan, iyang giduol ug gitan-aw ang biktima sulod sa panimalay niini ug didto nakita nga nagpakamatay kini gamit ang electrical cord nga gihigot sa iyang liog ug gihigot sa kisame.
Sumala sa asawa sa biktima nga si Cris, nasubo kuno ang iyang bana gumikan sa problema sa pinansyal ug sa away sa pamilya. (Richy F. Nalagon)