GIDALA ug ginatambalan karon sa Southern Philippines Medical Center (SPMC) ang usa ka alyas Jecjec, 27-anyos residente sa Bolton Bridge, Brgy. 76-A Bucana, dakbayan sa Davao human madunggaban, Dominggo sa kaadlawon, Marso 24.
Subay sa imbestigasyon nasayran nga bag-o pa nahitabo ang insidente, nagka-initay ang duha ka grupo sa mga lalaki sayong kabuntagon sa adlaw nga Dominggo sa Bolton Bridge, ug aron kuno mahuman, gihagit sa usa ka alyas Aldrin si alyas Jecjec og sumbagay.
Gani bag-o nagsugod ang rambol, gikapkapan pa ang duha aron maseguro nga walay kutsilyo nga ginatago ang duruha.
Samtang nagsinumbagay na, gibutyag ni alyas Mario uyoan ni alyas Jecjec nga klaro kuno nga pildi si alyas Aldrin gumikan kay halos dili niya masagang ang kinumo ni Jecjec.
Nagsige na lamang kuno og atras si Aldrin hangtud nga kalit na lamang gikuha ni Aldrin ang iyang kutsilyo ug gidunggab sa makadaghang higayon si Jecjec igo sa likod.
Human sa insidente misibat si Aldrin samtang gidala sa tambalanan si Jecjec. (Richy F. Nalagon)