NAKAHIAGOM og samad sa ulo ang usa ka lalaki human nag-wild ug buot manigbas dihang naglamay kinsa napildi sa “tong-its” didto sa Purok 8, Barangay Indangan, Buhangin siyudad sa Davao, Dominggo sa buntag, Marso 24.
Gidala sa Buhangin Police Station ang nagkadugo nga si Joel Cañete, 23-anyos, residente sa maong dapit human mabunalan sa ulo og bato.
Gidala usab sa maong buhatan ang usa ka Ramon Tahil, 43-anyos nga residente gihapon sa lugar ug gitudlo ni Cañete nga usa sa mga naglamay ang mibunal kaniya og bato.
Sumala pa nga anang kaadlawon pa, naglami ang inom ug ang pag “tong-its” sa usa ka haya sa maong lugar. Giingon nga nagdula kining si Joel Cañete og tong-its kinsa hubog na, ug dihang giingnan ni Ramon Tahil nga undang na lang og tong-its kay hubog na kini, misulti suma pa si Cañete nga di sa siya maundang kay napildi na siya.
Giingong kapila gibalik-balikan si Cañete nga paundangon og dula kay hubog na, apan nagdumili kini diin human sa pipila ka paghangyo niundang ug miuli.
Sumala pa ni Ramon nga human sa pipila ka minuto, mibalik si Cañete sa lugar kinsa nagdala og sundang ug nanghasi, hinungdan nga nag-iniyahay og panagan ang mga naglamay sa lugar, diin ang uban mipunit og bato ug gilabay ngadto ni Cañete.
Miresulta kini sa pagkasamad ni Cañete sa ulo ug gidala sa kapulisan sa tambalanan.
Sa karon, naghimo pa og imbestigasyon ang kapulisan aron masayran gayud ang tinuod nga nahitabo sa maong lugar aron mapanubag ang sad-an sa hitabo.