MALAUMON ang national director sa GlaMore Production Maan Aris nga ang mga pambato sa Pilipinas alang Miss Pre-Teen ug Miss Teen Princess mobalik sa nasud bitbit ang lain na sab nga korona sa ila unya pagsalmot sa international pageant.
Niadtong Marso 17 adunay send-off party alang sa mga Cebuana Princess nga sila si: Kasley Malaika Libres –Teen Miss Universe, Jashley Van Hemelen – Teen Princess of the World ug Sarah Nicole Filtness – Pre Teen Miss Universe.
Adunay tema nga “Journey to the Crown” ang send - off event nga gipahigayon sa Quest Hotel, Cebu City dungan sa media interview sa maong mga dalaga.
Nakadayeg si Aris sa Cebuana candidates nga iyang gihulagway nga “very competitive, talented, passionate and very committed to their platform” sukad nga gisugdan ang Teen Princess of the Philippines niadtong 2013.
Si Libres, 13 ug Filtness, 12 pulos mobiyahe sa Geogia, Europe sa Mayo 5 – 10. 2019 alang sa international competition samtang sa Hunyo 17 – 21, 2019 si Van Hemelen, 13 mo-compete sa Bulgaria.
Nasayran nga ang pagbahin sa ilang oras sa pagtuon ug training sa pageant maoy usa sa ilang challenges nga gi-atubang.
Samtang ang laing Cebuana beauty queen nga si Jessica “Jee” Candelasa – Eribal, Mrs. International 2017 nagsilbing pageant coach sa mga batan-ong kandidata ug giila nga supportive mentor.
Misaad sila si Libres, Van Hemelen ug Filtness nga palambuon pa ang ilang confidence ug ang pakighugoy-hugoy ngadto sa ubang kandidata atol na unya sa ilang international competition kinsa mipakita na sa ilang kalantip manubag ngadto sa mga sakop sa media ug blogger atol sa press conference. (FVQ)