SA GIPASIUGDAHANG social media poll ni 8-division world champion Manny Pacquiao, migawas nga nag-una sa listahan si Floyd Mayweather sa gusto sa boxing fans nga sunod ikaparang sa fighting senator.
Naa sab listahan ang world champions nga sila si Keith Thurman, Danny Garcia, ug Shawn Porter, pulos mga Amerikano.
Si Thurman maoy World Boxing Association (WBA) Super World welterweight champion samtang si Pacquiao maoy naggunit sa WBA welterweight regular title.
Si Danny Garcia maoy naghupot sa World Boxing Council (WBC) Silver World welteright title samtang si Porter maoy tag-iya sa WBC regular welterweight belt.
Sa 80,448 nga mga ningboto sa social media poll ni Pacquiao, moabot sa 73 percent ang ningpili kang Mayweather, 13 percent kang Thurman, 9 percent kang Garcia ug 5 percent kang Porter.
Ang gusto sa boxing fans mao sab ang gusto ni Pacquiao.
“There is a big possibility (we can fight again) because Floyd is coming back into boxing,” matod sa Pambansang Kamao ng Pilipinas sa interbyu sa World Boxing News.
“My thinking is to have a rematch and to make a clear decision on who will win the fight. In the last fight that we had, it wasn’t clear who won the fight because he didn’t throw a lot of punches and he won the fight.”
Gitataw ni Pacquiao nga wala sab siya makadiskarte og insakto sa premirong away niadtong 2015 gumikan kay adunay angol ang iyang tuo nga abaga. (ESL)