GIPAHIMUSLAN sa Dallas Mavericks ang pagpahuway sa pambatong pointguard sa host Golden State Warriors nga si Stephen Curry aron iposte ang dakong kadaugan, 126-91, kagahapon sa National Basketball Association (NBA).
Mihimo’g grabeng langas sa kombati ang dekalidad nga rookie sa Mavericks nga si Luka Doncic ug ang ilang manugretirong beterano nga si Dirk Nowitzki.
Si Doncic nagpakatap og triple-double nga 23 puntos, 11 ka rebounds ug 10 ka assists samtang ang 40 anyos nga si Nowitzki, kinsa gituohang moretiro na inig human sa season, nitampo og iyang season-high nga 21 puntos.
Ang Mavericks ningratsada dayon pagsugod pa lang sa kombati ug nakamugna na kini’g 22-7 nga labaw sa nag-unang upat pa lang ka mga minutos sa 1st quarter. Ning maong pagsutoy sa opensa sa Mavericks, si Nowitzki nakahimo na og 10 puntos.
Hasta ang mga sumosunod sa Warriors nga nagtapok sa Oracle Arena nakaabiba sa gipakitang duwa ni Nowitzki isip pagrespeto sa 21 niini ka mga tuig nga pagduwa sa liga.
“The last few games I didn’t have a good shooting rhythm. Today, I had it early and often,” matod ni Nowitzki, nga maoy labing sinaligan sa Mavericks sa batan-on pa kini.
Nagpadayon ang kabangis sa Mavericks sa bisan asa nga departamento sa duwa hangtod nga ningburot ngadto sa 43 puntos ang ilang labaw, 125-82, sa hinapos nga bahin sa 4th quarter. Ang Mavericks aduna pa’y laing upat ka mga magduduwa nga nakahimo og dobleng numero nga puntos.
Ang Warriors, nga usa sa unom pa lang ka teams nga nakaseguro na’g puwesto sa nagkaduol nga playoffs, nahagsa sa 49-23 nga rekord samtang ang Mavericks ningsaka sa 29-44 nga baraha.
Ning sangkaa, daw nabalikan sa iyang kabatan-on si Nowitzki ug alang kaniya, usa kini sa dili niya makalimtan nga kombati.
Ang Warriors gipangulohan ni Kevin Durant pinaagi sa iyang 25 puntos, nidugang og 19 puntos si DeMarcus Cousins. (AP, ESL)