NIPADAYAG ang Japan International Cooperation Agency (Jica) nga kon mahan-ay ang tanan human sa paghimo sa feasibility study sa ikaupat nga taytayan, isunod dayon niini ang pagbuhat sa detailed engineering design (DED).
Si Engr. Nonato Paylado, pangu sa planning division sa Department of Public Works and Highways (DPWH) 7, niingon nga kon mapahimutang ang tanan tali sa kagamhanan sa Pilipinas ug sa gobiyerno sa Japan, ilang nakita nga sa ikaupat nga quarter ning tuiga maproseso na ang loan agreement sa duha ka mga nasod.
“So, kumbaga direcho-direcho na ni from the FS (feasibility study) stage, DED, (detailed engineering design), and implementation,” sumala niini atol sa iyang presentasyon sa proyekto sa tigom sa Mactan Cebu Development and Coordinating Board (MCDCB) sa Kapitolyo niadtong Lunes, Marso 18.
Ang ikaupat nga taytayan nga tawgon og New Cebu Mactan bridge, ang usa ka tumoy anha pabarugon dapit sa Cansaga Bay habig sa siyudad sa Mandaue samtang ang pikas tumoy anha dapit sa Mactan Export Processing Zone (Mepz) sa Barangay Ibo, dakbayan sa Lapu-Lapu.
Sigon ni Paylado ang usa sa component sa New Cebu Mactan Bridge mao ang Mandaue Coastal Road. Kining duha ka mga proyekto kabahin sa master plan.
Siya nibutyag nga atol sa deliberasyon sa technical working group apil sa steering committee sa ilang ulohang buhatan, diin nitambong usab ang mga representante sa kagamhanan sa siyudad sa Lapu-Lapu, gipresentar ang tulo ka mga klase sa taytayan nga pagapilian base sa aktwal nga span o aktwal nga distansya nga himutangan sa ikaupat nga taytayan.
Kini mao ang extradosed bridge nga susama sa Marcelo Fernan Bridge, ang steel box girder nga dunay steel deck nga wala pa masuway og tukod dinhi sa Pilipinas ug ang steel truss bridge nga susama sa unang Mandaue-Mactan Bridge.
Matod ni Paylado sa maong tigom, ang nagustohan mao ang latest type nga tulay, steel box girder nga dunay steel deck nga gikonsiderar nga iconic.
"Aron silbi murag lahi kuno ba, aron lahi atong makita (dili pareha sa duha ka kasamtangang mga taytayan)," dason niya.
Siya nipasabot nga bisan og susama sa Marcelo Fernan Bridge ang extradosed nga klase sa taytayan apan hagip-ot kini nga klase nga nagpasabot manginahanglan sila og mas taas nga central span sa alignment sa 4th bridge.
“If you are going to adopt a longer span ang iyang height sa pillars will also be increased, when it increased, it will not conform with the CAAP (Civil Aviation Authority of the Philippines) regulations, the aerial clearance,” dugang niini.
Si Paylado namahayag ang steel box girder nga dunay steel deck okay sa gitugot nga gitas-on sa area clearance sa CAAP.
Siya nidugang nga bisan og compliant usab sa tanang rekisitos ang steel truss bridge sa navigational ug aerial clearance, apan susama kini sa unang Mandaue-Mactan bridge. (SCG)