GIKUMPIRMA ni Commission on Election (Comelec)-Northern Mindanao Director Jay Balisado nga sa pagkakaron wala pay deklarasyon nga adunay mga red hotspot sa panahon sa eleksyon sa Northern Mindanao.
Matud ni Balisado nga sama sa traffic light nga ang red maoy gikonsidera nga maoy labing taas nga kategorya kon diin ang pulo sa Mindanao ubos niini gumikan kay anaa man sa martial law ang pulo.
Apan kun dinhi sa rehiyon ang hisgotan wala pay matawag nga red hotspot kay gapaabot pa ang Comelec sa report sa Police Regional Office (PRO)-Northern Mindanao.
Gikonsidera lamang nila kining mga lugar kon hain adunay mga presensya sa walhong grupo hilabina niadtong mga natigayong pagpangsunog sa mga ekipo.
Dinhi sab sa rehiyon ang nahitabo mao ang pagpangbalhin sa mga personahe sa kapulisan sa nagkalain-laing dapit.
Gitutokan sab nila kining mga posibleng pagpangayo og permit to campaign sa walhong grupo ngadto sa mga pulitiko hilabina nga daw adunay pipila dili kabalibad niini.
Sa pagkakaron pabiling nakigkoordinar ang Comelec sa kapolisan aron mas mapahugtan ang seguridad niining mga lugar nga adunay presensya sa mga armado lakip na niining mga adunay mga bayolente nga gakahitabo.