GIHATAGAN og libreng training ang gatusan ka mga buta kinsa gikatakdang mapahawa sa amphitheater ilabi na nga gitakda nga bag-uhon ang tibuok Divisoria, Siyudad sa Cagayan de Oro.
Ubay-ubay ka mga buta ang nabalaka nga mawad-an og panginabuhian sa pagbag-o sa maong dapit.
Anaa sa 141 ka mga buta ang makabenepisyo niining programa sa lokal nga kagamhanan sa siyudad aron nga matabangan ug dili mawad-an sa panginabuhian bisan asa sila makapaingon.
Matud ni Rolando Damaolao, chairman sa person with disability (PWD) council, nga programa kini sa lokal nga kagamhanan sa siyudad.
“Usa ni siya sa atong program sa people empowerment program sa city government, four batches lang atong gi-cater tungod kay displace man ni sila sa amphi theater,” matud ni Damaolao.
Giingong gihatagan kini sa prayoridad niining maong programa alang na usab sa mga kredibilidad niining gatosan ka mga blind.
“So ato silang gitagaan og training para naa silay credibility of credentials sa ilang own kay pra kung asa sila anywhere sila kung mag apply, legal sila, sila atong gitagan ani nga programa," dugang niini.
Gidugang pa nga libre kini alang kanila lakip na ang assessment human nagsulat sa Technical Education and Skills Development Authority (Tesda) alang sa mga PWD.
“So nagsulat pud ta sa Tesda para mahatagan og libre nga NC II so libre na ang training, libre na pud ang NC II, wala nay bayad,” dugang niini.
Nasayran nga lakip usab sa selebrasyon sa women's month mao ang paghatag og libre nga tour sa mall ug sine alang sa 150 ka mga PWD diha sa SM Downtown Premier sa Marso 25.