ADUNAY pahimangno ang Commission on Elections (Comelec)-Northern Mindanao niining pila na lamang ka adlaw magsugod na ang kampanya sa mga nagpapili sa local nga mga kandidato.
Matud ni Comelec-Northern Mindanao director Jay Balisado nga unang buhaton sa mga kandidato mao ang koordinasyon sa mga local Comelec office.
“Para makabalo sila sa common poster area ug dili masayang ilang poster nga gitapot. Kung private property mananghid sila sa tag iya kay dili pwede motapot ta og bisan asa,” matud ni Balisado.
Dugang niini nga imbes nga ang gihingusgan sa usa ka kandidato mao ang adbokasya sa kinaiyahan apan kung namulot kini sa kahoy mawad-an kini og bili nga adbokasya.
“We claimed to be advocate of environment pero atong mga tarpaulin nagpasad kay gipamikit ug gipanglansang sa kahoy ...how can we reconcile that?” matud niini labina gidili ang paglansang sa tarpaulin diha sa mga kahoy sa kadaplinan sa dalan ug gisiguro niini nga ang personahe sa comele nakamonitor niini.
Gawas sa kandidato aduna sab kini pahimangno sa mga botante nga ilhon og maayo ang kandidato ug dili ibasi sa kagwapo sa gipamilit nga mga tarpaulin.
“Sa ato pod mga botante akong panawagan nila mokilatis sa mga kandidato kay dili mana pagwapohay og poster dili mana salida sa sine nga lami og poster diba? Dili padaghanay. Tan-awon nato kung qualified ba, wala ba siya’y daghang bagahe nga isyu?” matud niini.
Gawas niini gihangyo sab niini nga ang mga trabahante labina kadtong mga regular nga empleyado sa gobyerno nga likayan ang partisan political activity.
“Kung naa ta sa gobyerno they should refrain in engaging partisan political activity especially kon appointed position dili political so kung direkta ka nga staff sa mayor. You are there because of the trust and confidence of the mayor etc. pero kung empleyado ka dika pwede mangampanya,” matud niini ug miingon nga ang partisipasyon lamang niining mga trabahante sa gobyerno mao ang moboto sa eleksyon.
“Imong participation is enough to vote. Pero kung mosaka ka sa stage you might be violating sa atong election code engage in politicial criminal offense pwede ka mapriso. Dili sab worth mangampanya ka,” dugang niini.