NABAGNOS ang tangke sa motorsiklo ang usa ka lalaki ug nibangga sa ligid sa forward truck hinungdan sa pagdilaab sa sakyanan niadtong Dominggo, Marso 24, sa Purok 7, Upper Puerto, dakbayan sa Cagayan de Oro.
Patay si Daniel Yam-oc kinsa giingong residente sa Villanueva, Misamis Oriental.
Ang drayber sa forward truck nga kargado og baboy naila nga si John Mark Virtudazo, 28, taga Libona, Bukidnon.
Sa nahipos nga impormasiyon, giingong pauli na si Yam-oc apan aksidente kining nibangga sa maong sakyanan.
Giingong nabangil mismo ang ulo niini atol sa pagkabangga hinungdan sa hinanali nga kamatayon tungod sa kakusog sa impak.
Gidugang pa nga nibangga ang tangke sa motorsiklo ngadto na sa ligid sa sakyanan hinungdan na usab sa pagdilaab sa kalayo sa motorsiklo ug sa forward truck nga dali usab nga girespondehan sa tinugyanan sa Bureau of Fire Protection.
Ang maong insidente ang nakatala na sa buhatan sa kapulisan samtang ang patay nga lawas ang gi-atiman na sa nahabiling pamilya.