DILI mawala sa matag speech ni Presidente Rodrigo Duterte kung unsa niya kasuko sa mga tao nga nalambigit sa pagpayuhot ug pagamit sa ginadili nga druga, hinungdan nga hangtod karon panahona walay puas iyang sulti nga iya kining puhagon hangtod sa katapusan sa iyang termino.
Atol sa speech niini sa Partido Demokratiko Pilipino–Lakas ng Bayan senatorial rally nga gipahigayon sa University of Science and Technology, siyudad sa Cagayan de Oro, iyang gibutyag kung unsa ka dako ang epekto sa katawhan ang mga tao nga nalambigit sa ginadili nga druga.
Gibutyag niini nga sa Manila lamang moabot na ngadto sa 1.6 milyon ka tao ang validated nga drug user ug pushers. Usa ka pakete ang magamit sa usa ka adlaw sa kantidad nga tag P200.
“One sachet once a day lang mga P20,000 gikwenta ko na na maglisod nakong kwenta karon kay galagot lagot ko. One stick is P200, ingon ni kanhi Police Director General Bato Dela Rosa. Over 1.6 milyon ang validated nga nagsurender puro payat walay kaon. Maayo pod kay nag rice crisis man ta adtong una kini sila di mangaon kay guba naman og utok,” matud ni Duterte.
Kung kwentahon na sa 1.6 milyon ka drug user, ang mogasto og P200 matag adlaw daw dili mominos sa P9.6 milyon ang gasto sa usa ka bulan ug P1.2 bilyon nga kwarta nga nasayang sulod sa usa ka tuig.
“Dapat unta kining kwartaha moadto sa tuition, moadto sa pagkaon... wala na ug ang head of the family masirko sa druga. The entire family becomes dysfunctional mo-collapse kana kay ang head of the family lahi na iyang dad-on shabu na,” matud ni Duterte ug miingon nga apektado ang mga anak.
“Kining mga bata dili na mangiskwela magsuroy suroy napod diha sa area unya mo head napod na sila makita man nila ilang amahan,” matud ni Duterte ug midugang nga dili lang 1.6 milyon ang slave karon sa druga tungod wala pay labot niini ang kasikbit nga mga siyudad sama sa siyudad sa Cagayan de Oro, Davao City ug Iloilo.
Mibahad sab kini sa mga pulis nga nagbinuang ug nalambigit sa druga.
“Kamong mga pulis wala ta’y opisyal nga nangamatay pero ayaw mo og tuo inyo kong binunangan kamong mga polis una mong mamatay, do not f*** with me,” dugang niini.