MIBAHAD si Presidente Rodrigo Duterte nga pamatyon ang mga adik sa dakbayan sa Cagayan de Oro, kini atol sa iyang pagbisita dinhi niadtong Dominggo, Marso 24.
Matud ni Duterte nga pamatyon kining mga nalambigit sa ilegal nga druga sa dakbayan gumikan kay wala kini labot sa human rights tungod sa grabe nga paghitak sa ginadiling druga sa nasud.
“Kamong mga durugista diri sa Cagayan, Pilipino man ta naa man tanang media diri put*ng in*, patyon ta gyud mo, maniwala kayo sa akin pagka Presidente nako niingon ko (I) don’t give a sh*t about human rights,” matud ni Duterte.
Gidugang pa niini nga sa dili pa kini moadto sa impyerno, unahon niini ang mga adik pagtukmod.
“Una ko mosirko didto paingon sa impyerno, unahon tamo tukmod ngadto total ako wa man pud ko mag ambisyon og langit kay sa tinuod lang walay gwapa didto unsaon man na nakong langit?” dugang niini.
Nasayran nga kini ang gipanghingusgan nga kampanya sa adminsitrasiyon ni Duterte ug kung dili matud niini maangkon ang maong katuyoan sa pagpahunong sa ilegal nga druga, patay ug korapsiyon susama nga “failure” ang pamunoan niini.