Dear Noy Tikyo,
Just call me Ely, nagtrabaho na. Na-interest ko magpatambag nimo aning akong suliran karon.
Single pa ko apan 30 anyos na.
Duna koy uyab nga edad og 29 nga buwag sa iyang bana. Duna siyay usa ka buok anak. Unya wala na mosustento sa iyang anak human nga nagkabuwag sila mga duha na ka tuig ang nakalabay human makakita ang lalaki og laing babaye.
Gusto siya nga magminyo mi. Pero kay kasado man sila niadtong iyang bana, ako ang iyang pagastuhon sa iyang annulment.
Maayo kaha ning iyang ideya? Gusto sab unta kong mangasawa niya.
Ely
Ely,
Di sayon ang pag-anular og kasal kay taas nga proseso gumikan kay moagi ka og hukmanan ug sa samang higayon sa simbahan usab.
Gawas sa hataas nga proseso, di sab lalim ang imong magasto.
Duna koy friend nga babaye nga minyo na ug dunay usa ka buok anak. Apan nagbuwag sila sa iyang bana.
Human ang usa ka tuig nilang panagbuwag, dunay nagka-interes niyang lalaki.
Tungod kay nahigugma ang lalaki niya, ang lalaki maoy nangita og paagi nga maanular ang ilang kasal ug siya mismo ang naggasto niini.
Matud niya nga nigasto ang lalaki og kapin P100,000 sa maong proseso. Hinuon, wala sab sila magdugay sa lalaki. Kay human ang duha o tulo ka tuig, nagkabuwag sab silang duha.
Kini maoy imong angay nga timbang-timbangon karon. Kay sa tan-aw nako, bag-o lang mo nagkahimamat ning babayhana. Ug kanang inyong panagkaila, di pa igo aron nga mohukom ka gilayon nga uyonan siya sa iyang plano nga wa moagi og subsob nga paghunahuna.
Ayaw pagdali-dali, take time lang ug ilha una ang tinuod niyang pagkatawo. Kay basin unya og magbasol ka sa kaulahian. Kay gawas gasto, basin og biyaan ra pod ka niya ug tua siya sa laing lalaki mouban.
Noy Tikyo