PATAY ang mag live-in-partner sa Sitio Mananga 2, Barangay Tabunok sa siyudad sa Talisay human ni misukol sa gilusad nga anti-drug operation sa mga sakop sa Provincial Intelligence Branch (PIB) pasado alas 2 sa hapon sa Lunes, Marso 25.
Ang napatay diha-diha dayon mao si Alex Cuyogan hingkod ang pangidaron ug gitumbok nga hit man sa Tabunok samtang dead on arrival usab ang live-in- partner niini nga si Johanna Mae Dilar nga nakaangkon ug samad sa lawas.
Matod ni Senior Insp. Alejandro Batobalonos sa Provincial Drug Enforcement Unit (PDEU) nga sa dihang ila nang napalitan si Cuyogan nakabantay ni nga pulis ang iyang gika transact.
Mikuha ni sa iyang armas ug dayong pamusil sa mga operatiba ug mibawos ra usab ang mga police.
Atol sa pinusilay, ang mag live-in-partner misulod sa balay sa pamilyang Prajes nga hangtod nga napagan si Resty Abellana, 23-anyos nga naigo sa iyang tiyan.
Diriyot pa nga maigo ang usa ka 3 anyos nga batang lalake nga anak usab ni Resty, maayo nalang nga iya ning naitsa sa luwas nga lugar atol sa pag buto-buto.
Gawas sa iyang kalambigitan sa illegal nga drogas, nahimo usab matod pa kining gun-for-hire ug giila nga "armed and dangerous" tungod sa kadaghan na sa gipang pusil niini.
“Mao ni pina ka ngilngig diri sa Mananga. Daghan kaayo na nig napatay daghan tag unsolve cases tungod ani niya,” sigon ni Batobalonos.
Matod ni Marissa Prajes sa interview sa Facebook Live sa Superbalita Cebu, nga siga kaayo sa ilang lugar si Cuyogan nga bisan ang iyang bana nga nag kuha lang sa motor ang gisita pa sa suspek.
“Akung bana gisita ana niya adtong niaging adlaw kay kung wala pa nagpahayag akung bana, gipusil napud unta na niya,” matud ni Prajes.
Nakakuha ang kapulisan og mga binulto sa gituohang shabu nga motimbang sa 100 gramos nga gibanabana nga mobalor ang tanan sa dul-an P700,000.
Si Konsehal Vicente Rabaya sa barangay Tabunok nagkanayon nga gikahadlokan sa ilang lugar si Cuyogan.
Daghan na sila'g nadawat nga reklamo nga mga residente sa Sitio Mananga 2 tungod kay mag pasalba ni sa iyang armas kung masuko.
Tungod sa maong kamatayon, nagpasalamat ang konsehal nga aduna nay residente nga nangisog nga misumbong sa police.
“Dugay nani, na report nani namo sa Talisay, nagpasalamat mi sa taga dinhi nga wala na mahadlok nga mitug-an na gyud nga naa sila diri,” sigun ni Rabaya.
Ang PIB, uban ang Talisay City police Station, nakadawat og impormasyon nga padayon ang ilegal nga negosyo ni Cuyogan nga maoy hinungdan nga ilang gilusad ang buy bust operation.