PORMAL nang gi-deklara sa Philippine Atmospheric Geophysical and Astronomical Services Administration (Pagasa) ang panahon sa ting-init sa miagi nga semana.
Dili lang simple nga ting-init karon kay giduaw na usab kita sa El Niño nga magdala'g hilabihang hulaw sa pipila ka lugar samtang grabeng ulan sa ubang dapit.
Atoa nang mabatian ang kalagkit sa init ilabi na sa hapon nga daw nagdilaab sa naglagiting nga init sa adlaw.
Nitiyabaw na ang mga mag-uuma sa pipila ka probinsiya sa Mindanao kay nangliki ang ilang umahan sa hulaw.
Maayo na lang kay may miduaw nga Bagyong Chedeng sa rehiyon sa Davao nga mitugpa sa Malita, Davao Occidental nga nagdala'g dakong bul-og sa ulan mao nga nakapahupay sa ilang kaguol. Imbis mahadlok ta sa bagyo, gihandom na man hinuon kini sa katawhan.
Mao usab kini ang gipanghinaut sa katawhan sa Luzon kay kritikal na daw ang gitas-on sa tubig sa Angat Dam nga maoy prinsipal nga tinubdan sa tubig sa katawhan sa Metro Manila.
Kahinumdoman nga nagkagubot ang katawhan sa Metro Manila tungod sa kakulang sa tubig.
Tiaw mong moabot og 18-24 ka oras nga walay tubig matag adlaw didto sud sa pipila ka semana busa hasta ang gobyerno nabalaka na sab sa kahimtang sa madlang pipol.
Nasuta sa imbestigasyon nga bisan tuod anaay kakulang sa tubig sa dam, ang pagdumala sa pagdagayday o sistema sa distribusyon sa tubig ang problema mao nga gibaharan ni PRody ang konsesyonaryo sa tubig nga ibaliwala ang ilang katungod sa pagnegusyo og tubig kung di magtarong.
Apan nangutana ang kadaghanan kung tinuod ba nga may hadla sa kakulang sa tubig sa Pilipinas?
Sa akong tan-aw anaay basihan ang maong pangutana tungod sa gitawag nato nga "climate change" diin nagkataas ang temperatura sa kalibutan nga nagtunaw sa icebergs sa North Pole ug nagpataas sa gitas-on sa tubig sa dagat ug nagpahulaw sa lain-laing dapit sa kalibutan.
Ang Senado naghunahuna na nga maghatag og pundo alang sa "desalination project" o ang pagsalin sa tubig sa dagat ngadto sa tubig nga mainon sama sa gibuhat sa mga nasud sa Middle East nga walay tubig ug puro disyerto.
Bisan bulahan kita dinhi tungod sa daghang suba nga may tab-ang nga tubig, moabot ang panahon nga kinahanglang magmuntar og mga "desalination plants" bisan kung mahal pa kini sa pagkakaron.
Sa akong tan-aw, moabot ang panahon nga mahimong mitsa sa giyera sa kalibutan ang pag-ilog sa pagkaon ug tubig.
Mas mahal na unya ang usa ka botelya nga mainom nga tubig kaysa usa ka taro nga lana kay wala na gamita ang gasolina ug krudo sa pagpaandar sa makina kay anaa na ang hydrogen ug deuterium nga pangtubil.
Ilugon sa dagkong nasud ang gagmay nga may tinubdan sa tubig. Sama sa nahitabo sa Metro Manila, mag-away na unya ang matag silingan nga nag-ilog sa tinulo nga tubig.