DAVAO DEL SUR - Mialma ang mga drayber sa motorsiklo sa probinsiya sa planong dako ug doblehon na ang plaka sa mga motorsiklo.
Kini human gilagdaan na ni Presidente Rodrigo Duterte ang balaod sa Motorcycle Crime Prevention Act sa tinguha nga malikayan ang mga krimen nga gikalambigitan sa mga motorcycle riders.
Sumala sa rider nga si Boyet Carillo, molupyo sa dakbayan sa Digos, nga dili kriminal ang tanang adunay motorsiklo.
Gilatid sa maong balaod nga himuong doble ang plaka nga makita sa atubangan ug likod sa motorsiklo.
Tungod sa gidak-on sa sukod, makita na ang plaka bisan mga 15 metros ang gilay-on.
Ang rider nga si Jonathan Alcarias, taga Matanao, nagbutyag nga di lang sagabal ang duha ka plaka apan makahimo pa kini og peligro sa ilang pagmaneho.
Kini sab ang sentimento sa mga babayeng drayber og motorsiklo nga si Joana Padasay, 19, taga Bansalan, kay alang niya delikado kon masangit ang plaka sa laing motor.
Alang niya, lisud sa mga babaye ang mo-balanse sa pagpadagan ug mosamot na unya kon molabaw ang plaka sa motor.
Kahibaloang giduso ni Sen. Richard Gordon ang Motorcycle Crime Prevention Act sa pagtuo nga mas dali ang pag-ila sa mga kriminal nga nagagamit og motorsiklo.
Makamulta og P100,000 ang si bisan kinsa nga mosupak sa maong balaod. (Orlando B. Dinoy)