DIGOS CITY - Patay na ang 13-anyos nga babaye samtang naa pa sa Intensive Care Unit (ICU) sa balay tambalanan ang 14-anyos nga lalaki human naligo sa lawom nga bahin sa sapa.
Gibutyag ni Digos City Police Office director, Supt. Deozar Almasa kagahapon sa buntag, Marso 25, nga mga biktima giila lang nga si John, 14, ug Sofia, 13, pulos molupyo sa Purok Pag-Asa sa nahisgutang lugar.
Si Almasa nitataw nga kuyog sa mga biktima ang ilang mga higala nga naligo sa sapa didto sa Sitio San Nicolas, Barangay Tres de Mayo, alas 11:30 sa buntag, Dominggo, Marso 24, apan bugtong ang duha lamang ang gitabang.
Daling nakaresponde ang mga personahe sa City Disaster Risk Reducation and Management Council (CDRRMC) ug gidala ang mga biktima ngadto sa Medical Center of Digos Cooperative.
Nasayran nga alas 3:00 sa hapon sa maong adlaw, namatay si Sofia.
Subay sa imbestigasyon sa kapulisan, gitakdang mograduwar unta sa publikong tunghaan sa lugar si Sofia ug gitakdang mo-training sa Palarong Pambansa karong summer human nakuha sa "athletics running event."
Mga awtoridad nagpasidaan sa mga ginikanan nga di pasagdang maligo ang mga menor sa lugar kon way hamtong nga kauban ilabi na nga adunay mga bahin sa sapa nga hilabihan kalawom.
Gigamit sab nga quarry site ang maong sapa hinungdan nag-anam kini og kalawom. (Orlando B. Dinoy)