KIDAPAWAN CITY - Nagbitay sa kisame ug wala nay kinabuhi ang 14-anyos nga lalaki human maghikog sulod sa ilang balay, alas 10:50 sa buntag, Dominggo, Marso 24.
Ang namatay giila lang sa ngalan nga alyas Kim, ug molupyo sa Barangay Poblacion, Kidapawan City.
Sa taho gikan sa kapulisan sa Kidapawan City Police Station, nahibulong ang mga igsuon sa biktima nga wa migawas sa kuwarto ang ilang manghud human gitawag aron nga mamahaw. Hangtud nga niabot na lang ang paniudto.
Hinungdan nga gipugos sa pag-abri sa pamilya ang gikatulogan nga kuwarto sa batan-on. Ug dako na lang ang ilang kakurat kay ilang nakit-ang naghikog kini ug wa nay kinabuhi.
Nasayran nga nigamit og nylon cord ang batan-on nga iyang gihikot sa iyang liog ug ang pikas tumoy gihikot sa kisame sa iyang kuwarto.
Nahibaw-an sab nga sa wala pa mahitabo ang insidente, namatikdan sa iyang mga igsuon nga naghilom-hilom ang batan-on, nag-inusara ug mora og dunay dakong suliran.
Dunay nakasulti nga mga klasmeyt niini nga naglalis, matud pa, ang batan-on sa iyang uyab unya nagkabulag nga posibleng maoy hinungdan sa paghikog.
Walay nakita nga foul play ang kapulisan sa ilang imbestigasyon sa kamatayon sa ulitawo. (Edgar E. Fuerzas)