PADAYONG nagpaalim sud sa Southern Philippines Medical Center (SPMC) ang usa ka 28-anyos nga lalaki human gipusil og de bomba sa iyang ig-agaw Dominggo sa gabii, Marso 24, didto sa Barangay Talandang, Tugbok District, dakbayan sa Davao.
Ang biktima giila nga si Ian Jose Ngoho, 28 anyos, samtang ang suspek giila nga si Melchor Paas Ali, 33 anyos, ig-agaw sa biktima ug parehong residente sa lugar.
Sa inisyal nga imbestigasyon sa Tugbok Police Station, nakig-istorya ang biktima ngadto sa ilang silingan gumikan makig-kontrata kini aron sa pagpakopras ang ilang lubi.
Apan samtang nag-istorya na ang biktima ug ilang silingan ug nagkasinabot sa presyo, kalit misagbat ang suspek hinungdan nga nalubog ang transaksyon ug miatras ang silingan sa biktima gumikan sa pag-apil-apil sa suspek.
Gilayon nga miuli ang biktima ug misumbong sa iyang igsoon, hinungdan misulong ang isguon ug ang biktima sa balay sa suspek dala ang usa ka lagaraw.
Dihang nangabot na ang duruha sa balay sa suspek, gipamusil sila sa suspetsado gamit ang de bomba diin naigo ang biktima nga si Ngoho tumong sa tiyan.
Gidala dayon ang biktima sa tambalanan, samtang bulontaryo nga misurender sa opisyal sa barangay ang suspek kinsa napriso na sa kasamtangan didto sa Tugbok PNP. (Richy F. Nalagon)