IPASUSI sa mayor sa lungsod sa Alegria, Cebu nga si Verna Magallon sa kapulisan sa iyang lungsod bahin sa nigawas nga taho nga naa sa iyang lugar nagbutang og piggery ang usa ka pulis nga gipangita na sa Police Regional Office (PRO) 7 nga hinigugma ni Jocelyn Encila, nasikop ug giila sa awtoridad nga 'drug queen,' sa lungsod sa Consolacion.
Si Encila, giigong hinigugma usab sa usa ka bigtime drug lord nga si Rustico Ygot nga naa na karon sa New Bilibid Prison.
Matod ni Magallon, usa lang ang dunay dakong piggery sa iyang lungsod, kini ang Alegria Heavenly Ventures nga gipanag-iya sa usa ka negosyante.
Giklaro niya nga dili pulis ang nanag-iya sa maong piggery ug wala na sila masayod nga adunay laing piggery nga gipanag iya sa usa ka police nga nag Absent Without Official Leave na karon.
“Kami alert man gyud mi ana gani naa mi coordination sa kapulisan sa among hepe anang anti drug campaign , very supportive man mi so bisan kinsa, kung bisan asa nga part sa Alegria kung aha na siya amo gyud nang ipasusi sa mga police." matod ni Magallon.
Apan si Sr. Supt. Remus Medina, hepe sa Regional Intelligence Division 7, nagkanayon sa Superbalita Cebu nga ang maong pulis nga dunay ranggo nga Police Office (PO) 2 dunay piggery sa lungsod sa Alegria base sa ilang intelligence monitoring.
Dunay team nga gitahasan sa pagsusi sa mga kabtangan sa maong pulis sanglit dili lang piggery ang gipanag-iyahan niini lakip na ang mga balay sa lungsod sa Compostela ug Consolacion. (AYB)