PADAYON ang pagsugamak sa Alab Pilipinas ug nakatilaw na sab kini’g laing kulbahinam nga kapildihan batok sa host Saigon Heat, 81-80, niadtong Dominggo sa gabii atol sa pagtiklop sa elimination round sa Asean Basketball League (ABL) sa CIS Arena sa Vietnam.
Kini maoy ikaupat nga sunodsunod nga kapildihan sa Alab Pilipinas.
Hinuon kon buot hunahunaon, wala ra nakaapekto sa Alab Pilipinas kining maong kapildihan gumikan kay naselyado na man nilang daan ang No.2 nga luna paingon sa playoffs.
Ang Alab Pilipinas ninghuman sa ilang tahas sa elimination round dala ang 18-8 nga rekord sunod sa No.1 team Formosa Dreamers sa Taiwan nga adunay 19-7 nga rekord.
Sa playoffs, ang defending champions Alab Pilipinas makigsangka sa seventh-seed Hong Kong Eastern sa best-of-three series nga duwaon karong Biyernes sa Hoops Dome sa Lapu-lapu City.
Grabe ka sikit ang kombati sa duha ka mga kampo gikan sa sinugdanan hangtod sa katapusan.
Mialisngaw na unta ang kadaugan alang sa Alab Pilipinas dihang naa kanila ang posisyon sa bola sa nahabiling 25 segundos diin nagtabla ang duwa, 80-80, niadtong mga gutloa.
Apan sa dihang milusot si Bobby Ray Parks Jr., napalakan kini ni Kyle Barone ug nailog sa Saigon Heat ang posisyon sa bola.
Sa nahabiling 1.5 segundos, nakahagpat og foul ang import sa Trevon Hughes nga maoy naghatod kaniya sa freethrow line.
Napasulod ni Hughes ang iyang premirong freethrow unya tuyo niyang gisipyat ang ikaduha niyang freethrow aron dili na makatawag og timeout ang Alab Pilipinas.
Ang Saigon Heat miangkon sa ikalimang puwesto dala ang 14-12 nga baraha. (ESL)