PATAY ang tulisan human maaktohan sa pulis nga nanulis sa usa ka PUJ sa dalan Magallanes eskina El Filibusterismo, Barangay Ermita, siyudad sa Sugbo niadtong Dominggo, Marso 24, pasado alas 8:00 sa gabii.
Napatay si Hygie Mendez Mambiar, hingkod, taga sitio Tabay Lawom, Barangay Tisa, siyudad sa Sugbo.
Sakay si PO3 Nemesio Dinopol, sakop sa Parian police station sa front seat sa 04H nga PUJ nga adunay ruta nga Plaza Housing nga gimaneho ni Arnel Lechido.
Apan pag-abot sa maong dapit, kalit lang nga adunay niingon og “tulis” sa luyong bahin sa PUJ.
“Ambi na inyong mga cellphone! Pamusilon ta mo,” pulong sa tulisan.
Sa paglingi sa pulis, nanion kini og armas sa mga pasahero ug sa dihang nakuha na ni Mambiar ang duha ka cellular phone sa duha ka pasahero nga silang Rocky Gique ug Jaime Gabucan, pulos taga barangay Banilad, nagpaila dayon si PO3 Dinopol nga pulis dalang tion sa iyang armas.
Apan inay motahan, nihana na hinuon kini og pusil sa pulis, hinungdan nga giunhan sa naulahi.
Nakakanaog pa ang suspek ug nakadagan og 50 metros gikan sa PUJ apan nahagba ra kini sa karsada tungod sa pinusilan sa lawas.
Nabawi sa mga biktima ang ilang cellular phone ug nakuha usab ang 9mm nga armas sa suspek nga adunay tulo ka buhing bala nga naa pa sa cylinder ug upat ka basiyo niini.
Matod ni Chief Insp. Randy Caballes, hepe sa Carbon police station, notado nga tulisan si Mambiar sa Tisa.
Tungod sa gihimo sa pulisa, hatagan og commendation ni Sr. Supt. Royina Garma, direktor sa Cebu City Police Office (CCPO)0 si PO3 Nemesio Dinopol ug irekomendar sa Police Regional Office (PRO) 7 nga hatagan og award nga Medalya ng Kasanayan.
Matod ni Garma nga usa ka bayanihon ug maisugon ang gihimo sa iyang sakop ug angayan kini nga pasidunggan.
Gidayeg niya si PO3 Dinopol nga bisan off duty kini, nitubag gihapon sa tawag sa serbisyo.
Ipasubay usab ni Garma ang mga kaso sa tulis sa mga PUJ sa siyudad sa Sugbo kung siya ba gihapon ang responsable ug niawhag sa mga biktima sa pag-ila sa suspek.