SABADO sa gabii. Gipaslak ni Stephanie ang ‘plug’ sa iyang ‘laptop’ sa ‘convenience outlet’ sa bungbong sa iyang lawak diin nahisampig ang ‘computer table.’ Naabli ang kompyuter dihang gitulpok niya ang ‘start button.’ Giablihan niya ang ‘folder’ sa iyang mga sulat ug gi-klik ang ngalan ni Darren, iyang uyab. Magsuwat siya karon kang Darren, usa ka suwat-panamilit, kay si Darren kaslon na ugma sa buntag sa Cebu Cathedral sa usa ka babaye nga suod niyang higala, apan sekreto nga karibal sa gugma ni Darren. Wa siya magdahom nga sekreto diay nga nanguyab si Darren kang Karla kay sa higayon nga mag-bonding sila, kalagmitan sa Sabado sa gabii sa Mango Square, wa man siyay nakita nga lahi nga tinagdanay nilang Darren ug Karla. Nasayod man sab gyud si Karla nga uyab silang Darren.
Apan naunsa man nga nakigbuwag man hinuon si Darren kaniya sa miaging buwan kay magpakasal na sila si Karla? Ni-check in sila niadto sa Kingstone Lodge. Gibuhian ni Darren ang makabungog nga balita human sa ilang pagminahalay ibabaw sa kama
“Ngano man, Hon, nga imo man ning gibuhat nako? Di ba misaad ka nga kita na hangtod sa hangtod?” Naghilak siya nga namulong samtang nanglingkod sila nga hubo ang mga lawas sa ngilit sa kama.
“Dili kapugngan, Hon. Mabdos si Karla og duha ka buwan. Kinahanglan pakaslan ko siya aron maluwas iyang dungog. Aron usab di ko kanganlan nga iresponable ug nahadlok sa akong responsabilidad kang Karla ug sa amo unyang anak,” ni Darren nga miagbay kang Stepahnie.
“Ako diay, wa diay kay responsabilidad nako? Gikatugyan ko na nimo sa daghang higayon ang akong lawas, ang akong kalag, ang akong gugma. Di diay ikaw responsable sa akong status sa kinabuhi?” ni Stephanie nga miatubang kang Darren ug mitutok hugot kaayo sa mga mata niini. Buot niyang tugkaron ang pagbati nga gihambin karon sa lalake nganha kaniya.
“Aw, okey ra man pod nga magkita ta panagsa, Hon. Likayan lang nato nga mahibaw-an ni Karla nga nagpadayon atong relasyon,” hagawhaw ni Darren. “Kana kon higugmaon mo pa ako bisan kon kasal na mi si Karla.”
Nagpanglingo-lingo si Stephanie. “Di na nako mahimo. Suod ming higala si Karla. Di ko buot nga traydoran siya. Di ko sama nimo nga mabudhion sa imong panaad ug panumpa!”
Unya nabati niya nga migakos si Darren kaniya. Hugot nga paggakos daw nanamilit. Nanghigda sila. Mibawos siya paggakos og hugot kang Darren. Kini na ang katapusan nilang pagminahalay ibabaw sa kama.
ANG sagunson nga paghot sa iro sa iyang silingan nakaputol sa hamubong paghandom ni Stephanie kang Darren. Gitutokan niya ang ‘monitor’ sa iyang laptop ug misugod pagtulpok sa mga letra sa keybord.
“Dear Darren, I love you so much! It really hurts me that you’ll leave me. Para nako wa nay bangaw nga motumaw pa sa akong langit. Higugmaa ug panggaa si Karla. Sama sa managsuon ang among pagkasuod. Kon unsay mahitabo nako, ayaw basula imong kaugalingon. Gikahatag nimo kanako ang kalipay nga akong bawnon bisan asa ko mahidagsa gikan dinhing kalibutana. I understand you really need a real woman to love and marry and be mother to your children. Di ko kahatag ini kanimo. Usa ako ka lalake sama nimo, apan ang akong kasingkasing... kasingkasing sa usa ka babaye nga nahigugma sa tiunay kanimo. Way bili kanako ang kinabuhi kon wala ka sa akong kiliran! Goodbye! Vaya con Dios!” Ug gi-type niya sa kinaubsan sa suwat: ‘Loving you forever, Stephanie/Steve.’
Midagayday ang daghang mga luha sa mga aping ni Stephanie samtang mi-klik sa ‘Compose’ sa iyang laptop aron pag-email sa iyang suwat kang Darren. Unya gikuha niya ang inandam nga garapa nga may markang kalabera ug gihurot pagyarok ang likido nga sulod niini. (KATAPUSAN)