DI MOHUNONG ang kalambuan sa Tuburan ug mapadayon ang iyang mga inisyatiba batok sa kakabus, mga social services ug panglawas, ug alang sa kahapsay ug kalinaw.
Mao kini ang gipamahayag ni Mayor Aljun Diamante sa miaging Biyernes atol sa iyang State of the Municipality Address diin iyang gipangdetalye ang mga proyekto alang sa lungsod sulod sa tulo niya ka termino.
Gawas pa niini, gipaabot ang dugang pa mga proyekto alang sa kalambuan sa lungsod.
Nagkanayon siya nga ang Tuburan coffee giila na karon sa tibuok nasud ug sa gawas. Nakahatag kini og desenteng paningabuhi sa nagkadaghan nga mga taga Tuburan.
Gipaabot na sab ang two-storey nga merkado nga mobili og pipila ka milyon.
Sa pagkakaron, ang iyang manghod nga si Danny Diamante mao ang nidagan alang sa pagka mayor aron masiguro nga di mohunong ang direksyon karon sa lungsod.
Si Aljun, sa iyang bahin, nidagan alang sa pagka bise mayor. Silang duha nidagan ubos sa adbokasiya nga “Kalinaw ug Kalambuan sa Katawhan.”
CYBER LIBEL
Angayang magmatngon ang tanang aktibo karon sa mga politikanhong pagkukabildo diha sa social media labi na sa Facebook. Kini ako gyud nga gisiguro nga mapaabot sa mga sakop sa Maghisgot Kitag Politika Bay, usa ka FB group nga usa ta sa mga administrator.
Ako kining gisulat karon human nakabasa nga duha ka mga broadcaster didto sa North Cotabato ang nakumbikto ug silotan og walo ka tuig nga pagka priso tungod sa cyber libel.
Matod pa, ang RTC sa North Cobatabo nipahamtang sa maong sentensiya human nikiha si North Cotabato Gov. Emmylou Mendoza tungod sa mga gi-post nga mga pasangil sa duha diha sa social media.
DALAYGON
Bisan og off-duty na nga nisakay og usa ka PUJ padung pauli, apan way kahadlok nga nipusil sa usa ka tulisan kini si PO3 Nemesio Denopol nga na-assigned sa Parian Police Precinct.
Ang maong tulisan nga armado og .22 kalibre nga revolver nisakay sa PUJ nga gisakyan ni Denopol padung sa Plaza Housing ug nideklarar og holdup. Nisugod na sa pagpanguha sa mga cell phone ug mga alahas sa mga pasahero dihang nahitabo ang pinusilay.
Pagka nindot kon sama ni PO3 Denopol, ang hero-policeman, ang uban pang mga pulis. Alang kanako, dako kini nga dungog alang kang Police Chief Royina Garma.
BARKO
Congratulations alang sa pamilyang Lite Shipping ug kang Jun Lim sa paglusad niini sa m/v Lite Ferry 19 nga mobiyahe sa ruta nga Cebu-Ormoc. Mao kini ang usa ka shipping line nga nilambo uban sa kalambuan sa Sugbo ug sa rehiyon. (@anol_cebu sa Twitter)