PADAYON. Di angay mabalaka ang pamilya ni Christine Lee Silawan, ang biktima sa linuog nga pagpatay, sa pagpagawas ni John (dili tinuod ngan) sa iyang detensyon gikan sa Department of Social Welfare and Development (DSWD) tungod kay ipadayon man gihapon ang kaso nga murder batok kaniya nga gipasaka sa NBI-7.
Si John, 17, mao ang suspetsado ug gikiha sa NBI sa pagkamatay ni Christine. Nakakuha og paborable nga resolusyon sa piskaliya ang abogado sa akusado tungod sa rason nga gidakop siya sa NBI nga walay orden de aresto. Apan ang NBI mopasaka pa og motion for reconsideration.
Si John gisikop sa mga sakop sa NBI human sila makombinsi pinaagi sa ebidensya nga ilang nahipos nga kining uyab kaniadto ni Christine maoy posible nga mipatay. Gawas pa niana, si John mao ang katapusan nga nakit-an nga kuyog ni Christine sa wa pa siya gipatay ug gipanitan ang nawong.
Bisan tuod gibuhian na si John gikan sa kustodiya sa DSWD apan ang kaso nga murder nga gipasaka sa NBI diha sa Lapu-Lapu City Prosecutor’s office magpadayon ug ipatigayon ang preliminary investigation batok kaniya. Temporaryo lang ang kagawasan nga naangkon karon ni John kay og mapamatud-an sa NBI nga siya ang nagpatay ni Christine makalabuso gihapon siya.
Gani, gitagoan karon si John sa iyang pamilya tungod sa kakuyaw sa iyang kinabuhi. Dunay dakong posibilidad nga panimaslan siya bisan wa pa matino nga siya gyud ang mipatay labina kay human sa pagsusi sa DSWD nahibaw-an nga duna na siyay “discernment” kon pag-ila sa iyang aksyon.
Sa way paghusgar kang John, manghinaut lang ta nga mapamatud-an sa NBI ug pulis ang mipatay kang Christine. Gani, matud pa sa Lapu-Lapu city police ila gihapon nga ipadayon imbestigasyon bisan kon dunay kaso na nga gipasaka batok ni John sa posibilidad nga duna kini laing kauban atol sa krimen.
Ayaw na lang ipadayon ang imong plano Dr. Persida Acosta, ang hepe sa Public Attorney’s Office (PAO), sa pagpa-awtopsi sa lawas ni Christine kay mosamot og kaguliyang ang imbestigasyon sa iyang kamatayon. Sa miagi nga semana mibuhi og pung si Acosta nga iyang ipa-awtopsi ang lawas ni Christine aron mahibaw-an ang hinungdan sa iyang kamatayon.
Gisaway si Acosta ni NBI-7 Director Tomas Enrile nga di magapil-apil kay walay mandato ang iyang opisina. Ang PAO, mao ni opisina sa kagamhanan nga mohatag og libre nga serbisyo sa abogado sa mga sinumbong o mosumbong nga way kwarta ikabayad sa mga pribado nga abogado.
Tungod sa pag-entra ni Acosta sa isyu sa dengvaxia, ang bakona kontra sa dengue, ang mga ginikanan sa mga bata nahadlok na magpabakona.