ANG first division sa Commission on Elections (Comelec) mi-disqualify kang north district Councilor Alvin Arcilla gumikan kay nakahuman na kini sa iyang tulo ka termino nga miabot og siyam ka tuig. Katapusan na unta nga termino ni Arcilla karong tuiga nga matapus unya sa Hunyo 30. Apan gumikan kay miagi man siya og suspension uban sa iyang mga kaubanang konsihal mao kadto ang gihimo niyang rason nga molansar karong umaabot nga Mayo 13 nga eleksiyon ubos gihapon sa Bando Osmena Pundok Kausawagan (BOPK).
Duha ni sila nga adunay susamang kaso. Ang usa si Konsihal Sisinio “Bebs” Andales nga naa gihapon sa BOPK. Na-una lang og desisyon ang kang Arcilla. Ambot og nganong gitugutan ni sila sa liderato sa BOPK nga molansar gihapon? Nagtuo siguro sila nga puwede nilang malutsan ang balaod. Pero bisan wala na lang unta ang balaod ba. Ang ila nalang untang delicadeza. Nganong dili man lang mopahuway og usa ka termino o balig tulo ka tuig nga serbisyo publiko? Wala na ba gyud silay lain panginabuhian?
Na-suspenso sila si Andales ug Arcilla uban nila ni kanhi mayor Mike Rama ug Vice Mayor Edgardo Labella ug ubang mga konsihal niadtong 2016 gumikan sa ilang pagdawat sa calamity assistance nga ila usab nga na-aprobahan sa konsiho alang sa mga empleyado ug opisyal sa City Hall human sa 7.2 magnitude nga linog. Adunay misang-at og kaso ngadto sa Office of the President panahon ni Presidente Aquino hinungdan nga na-suspenso sila.
Apan matod pa sa Comelec nga dili pa final ang desisyon sa Comelec first division kay maka-file pa og motion for reconsideration si Arcilla sa Comelec en banc. Aw, puwede pang mabutaran si Arcilla kay naa man ang iyang pangalan sa balota. Posible pa man gani nga makalingkod pa ni siya kon modaog. Unya sa akong nahibaw-an ra ba nga walay substitution nga mahitabo sa ilang partido. So, ang mahitabo di basta-basta mahulipan dayon si Arcilla isip sakop sa BOPK kon ma-disqualified with finality sa dili pa ang eleksiyon. Magkuwang ang taga BOPK. (bobbygnalzaro@gmail.com)