NAKAHATAG og dakong leksiyon sa Bando Osmena Pundok Kauswagan (BOPK) kining nahitabo karon ni konsehal Alvin Arcilla sa Cebu City north district kansang kandidatora sa umaabot pinili-ay gi-disqualify sa Commission on Election (Comelec).
Si Arcilla nagpasubli pagkakonsehal bisan pa man og napupos na ang iyang tulo ka sunodsunod nga termino.
Ang iyang rason nga naputol ang iyang serbisyo sa dihang nalakip siya sa mga gipangsuspenso niadtong 2016 tungod sa pagpagawas sa konseho og financial assistance ngadto sa mga City Hall employees ug officials human sa nahitabong linog.
Usa ka Allen Canoy ang mipasaka og petition ngadto sa Comelec aron sa pagkanselar sa certificate of candidacy ni Arcilla ug mitumbok sa Section 8, Article X sa Batakang Balaod ug Section 43(b) sa Republic Act (RA) no 7160.
Kini naglatid nga way local elective officials nga moserbisyo lapas sa tulo ka sunodsunod nga termino sa samang posisyon ug ang pagkasuspenso sa puwesto dili makonsiderar nga pagkaputol o pagkabalda sa serbisyo.
Wa kini kalahian sa sitwasyon ni Atty. Sisinio Andales, kauban ni Arcilla sa BOPK. Wa pa man tuod mahukmi ang kang Andales, apan way rason kon nganong dili siya mahisama sa kang Arcilla.
Ato na kining nahisgutan dinhi sa niaging tuig pa, ug natinuod gyud.
Dili na usab mahimong mahulipan ang duha kay hagbay ra man nga nahuman na man sab ang deadline sa pag-file sa COC.
Dili sab mahimong gamiton ang ilang COC sa laing tawo kay misrepresentation na man sab na.
Sa laktod nga pagkasulti, mangampanya na unya ang BOPK-North nga kiwang ang ilang grupo kay unom ra man ang ilang konsehal nga makigkombati batok sa walo sa ilang kaatbang.
Sa kadaghang kaalyado sa BOPK, ambot og nganong nisugal ug namasin pa man gyud sila niining duha.