MAASIN, Southern Leyte - Nagplano ang Provincial Government sa Southern Leyte nga magdeklarar og state of calamity lukop lalawigan tungod sa epekto sa El Niño ug kabarato sa kopras.
Matod ni Vice Governor Christopherson Yap, daghan na sila og nadawat nga mga yangungo sa mga mag uuma sa ilang lugar.
Nag-una niini ang problema sa El Niño diin apektado ang panginabuhian sa mga mag-uuma.
Niini, gihisgutan sa mga opisyal sa kapitolyo ang mga lakang nga ilang buhaton aron matabangan ang mga mag-uuma.
“Mao nay among gihisgutan nga pwede ba mi magdeklarar og state of calamity kay dako man ni nga part,” matod ni Yap nga nahinabi sa Superbalita Cebu.
Nag-una nga panginabuhian sa Southern Leyte ang agrikultura.
Dugang ni Yap nga mayoriya sa mga naa sa agricultural sector ang apektado.
“Dili majority sa mga tawo but majority sa amo mga farmers ang apektado niini,” pasabot ni Yap.
Usa sa mga plano sa Kapitolyo ang paghatag og bugas sa mga apektadong mag-uuma aron maalibyuhan sa pagka karon ang ilang inadlaw nga kaon.
“Naay pundo ang Probinsya nga pwede nato iayuda nila. Mao na ang among plano puhon nga maghatag mi og napulo ka kilong bugas each farmer nga pwede matustosan ilang pang adlaw adlaw. Band aid remedy lang ni,” matod ni Yap.
Gisugilon usab ni Yap nga dunay igo nga pundo ang Kapitolyo para sa ayuda apan gikinahanglan ang insaktong proseso sa paggamit niini.
“Mo coordinate mi dayon ani sa Commission on Audit hasta sa Philippine Coconut Authority ug uban pa kay di man mapagawas ang pundo og di nato i-agi sa proseso,” pasabot ni Yap.
Gumikan sa ka seryuso sa problema, buot sa Kapitolyo nga molahutay ang solusyon nga himuon.
“Nakita nako nga dili ni nato i-kindergarten ang problema. We have to think outside of the box and long term gyod” dugang ni Yap.
Buot usab makigalayon sa national government ang Kapitolyo tungod sa maong problema.