NIABOT na karon sa dul-an 20,000 ka mga Mandauehanon ang gitabangan sa Kagamhanan sa Dakbayan sa Mandaue nga mahimo nga benipisyaryo sa Philhealth.
Martes sa buntag, Marso 26, gihimo ang ceremonial nga pagpang-apud-apud sa Philhealth certificate ngadto sa dul-an 10,000 ka mga benipisyaryo sa dakbayan sa Mandaue.
Anaa lang hinuon sa kapin lima ka libo ang ningtunga sa pagpang-apud-apud kay ang uban sa mga benipisyaryo, hatagan kini ngadto na sa ilang matag barangay.
Dunay gitakdang programa alang sa pag-apod-apod.
KINSAY GIHATAGAN
Sa ceremonial nga pagpang-apud-apud. anaa ang 2,063 ka persons with disabilities, 120 ka mga tricycle drivers, 2, 799 ka mga manindahay sa daplin sa dalan ug uban pang mga ordinary nga mga lumolupyo ilabi na ang mga kabus kaayo, 102 ka mga barangay health workers ug 720 ang mga kawani sa clean and green.
Gitug-an ni Mandaue City Mayor Luigi Quisumbing, kinsa maoy nangunay sa pag-apod-apod sa mga certificate nga nidoble ang ilang gitabangan nga mahimong miyembro sa Philhealth kay ilang gipalapdan pa ang programa.
Agi kini og tubag sa awhag ni Presidente Rodrigo Duterte alang sa libre na nga pagpaospital.
Niadtong Pebrero gipirmahan ni Duterte ang Republic Act No. 11228, nga nagmando nga ipaubos ang tanang PWDs sa Philhealth.
Mao kini ang balaud nga nag-amendar sa R.A. No. 7277 kun “Magna Carta for Persons with Disability.”
Ning tuiga, matod ni Quisumbing nga gipaningkamutan nga moabot sa dul-an 10,000 ang mga madugang nga mamahimo nga benipisyaryo sa Kagamhanan sa Dakbayan sa Mandaue isip mo-sponsor ug magbayad sa Philhealth.
Nidoble kini gikan sa kapin 4,000 ka mga benipisyaryo matag tuig sa miaging katuigan.
Adunay gigahin ang Mandaue City Government nga P24 milyones alang na sa dul-an 20,000 ka mga gipamyembro sa Philhealth.
Gihimo ang distribyusyon sulod sa Mandaue City Sports Complex, dungan sa pagpang-apud-apud sa certificate.
LABING KABOS
Nipasabot si Mary Antonette Peregrino sa Philhealth Mandaue sa kamahinungdanon ug kadakong tabang kon myembro sa Philhealth.
Iya usab nga gipahibawo kinsa ang mga kwalipikadong makadawat niini nga benepisyo ug unsa kamahinungdanon ang ilang programa alang niadtong maospital nga way ikasarang.
Si Quisumbing usab niingon nga gipakita sa Siyudad nga duna kini ikasarang sa pagsuporta iyang mga residente, kinsa maisip nga labing kabos.
“Ang selection namo ana is of course ang poorest of the poor. And those who are most vulnerable sa health problems such as the PWD sectors, mga tricycle drivers and operators and other sectors that may need health care or are greater risk for possible incidents. Gawas sa beneficiaries, apil nila ang four family members that are under 21 years old, to help further improve the healthcare of the City. And this only goes to show nga basta wala lang kurapsyon kaya man diay,” pamahayag sa mayor sa Syudad sa Mandaue.