FLORIDA, USA--Gibayaw sa panganod sa tumang kalipay ang Filipino community sa Orlando, Florida, human sila gipaduwa sa basketball kagahapon sulod sa Amway Center, ang homecourt sa Orlando Magic sa National Basketball Association (NBA).
Ang Pinoy Basketball League (PBL of Orlando) community gipaduwa dili lang usa, dili duha apan tulo gyud ka oras sulod sa ilang dugay na nga gipangandoy nga korte sa sikat nga NBA.
Ang lumad nga taga Alcoy, Cebu ug sa samang higayon Vice President sa PBL of Orlando nga si Armel Mosqueda nagkanayon nga di katuohan nga daw nagdamgo sila nga nakaduwa sa nahisgutang arena.
“Ang naka nindot kay ang Orlando Magic ni provide sila namo og daghan nga security personnel unya naa pa gyod naka standby nga paramedics, gipakasama mi nila nga NBA Players” dugang ni Mosqueda.
Gisugdan ang duwa’ng lima-lima sa mga Pinoy sa ala una sa hapon diin gi tapos sa alas kwatro nga gibahin sa duha ka duwa sa mga edaran samtang duha sab ka duwa sa mga bata.
Mikuha’g mga referees ang PBL nga nagsilbing nagpadagan sa duwa nga gisaksihan mismo sa mga representante sa Magic, pamilya, paryente ug kahigalaan sa mga players.
Gipaduwa ang mga Pinoy sulod Amway Center human ang Magic Management mitanyag kanila dihang subra’s 200 ka tickets ang gipakyaw sa mga Pinoy NBA fans atol sa 1st PBL Heritage Night diin mi host ang Magic sa Dallas Mavericks niadtong Marso 8 ning tuiga.
Ang PBL of Orlando gilangkuban sa mga ex-PBA players, ex-commercial ug varsity players, inter-barangay players ug pamilya ug higala sa mga players gikan sa nagkadaiyang dapit sa Pilipinas.
Si Baclayon, Bohol native ug ex-San Miguel Beermen ug ex-UV Green Lancers point guard Edward Naron ang nagsilbing commissioner sa maong liga.
Si Ibabao-Estancia, Mandaue City native Chad Roz nga usa ka physical therapist maoy PBL President, samtang si Leigh Aranas Mosqueda ang corporate secretary ug si Joy Quinain isip treasurer.
“Mura ko ug gadamgo, di ko katu-o nga gipaduwa mi sa NBA sa ilang korte, sacred baya ni para nila. Proud kaayo mi nga naka duwa mi sa Amway Center” segunda ni Roz.
Si Roz usa sa mga anak ni retired broadcaster Salvador “Dodie” Roz ang kanhi personnel manager sa GMA-7 Cebu ug kanhi disc jockey (DJ) sa 99.5 RT ug dySS Super Radyo Cebu.
Naglangkob sa Board of Directors sa PBL sila si Buddy Alo, Ted Quinain, Crisner Gonzales, Charl Teofilo, Eric Dominguez ug Richard Gutiérrez. (DQG)