SUPERBALITA CAGAYAN DE ORO

Todino: Migrabe na gyud ang drugas

Pro Bono

HALOS matag adlaw magbansiwag sa mantalaan ang mga niloog nga krimen gilambigitan sa gidili nga drugas.

Apan, dili kana maoy hinungdan nganong giangkon ni Presidente Duterte nga “migrabe” na gyud pag-ayo ang problema sa drugas sa Pilipinas.

Karong panahona dili na minilyon ka pesos nga balor sa drugas ang nasakmit sa awtoridad. Moabot na kini og binilyon ka pesos.

Matod ni Duterte kasurinderon na gyud ang kapulisan. Tiaw mo sukad gilusad niya ang kampaniya batok sa drugas niadtong 2015 mokapin na sa 5,000 ka mga tawo ang nangamatay apan naa gihapon kining drugas.

Nahadlok si Duterte nga masusama sa Mexico ang Pilipinas nga giyak-an sa Sinaloa drug cartel, kining labing dakong network ug sindikato sa drugas sa tibuok kalibutan.

Dali ra kuno kaayo malutsan ang Pilipinas og drugas tungod sa kadaghan nga isla nga pwede idunggo sa mga sindikato ilang mga kontrabando. Dili na malalis!

Unsa ba gyuy labing epektibo nga solusiyon aron mapugngan kining pagkuyanap sa drugas?

Kaniadto pa, konbensido gyud ko nga maundang lamang kining drugas kon malamdagan gyud ang kadaghanan nato sa maayong gawi.

Una, kon hingpit mawala kining pangurakot, segurado wala nay opisyal sa gobiyerno – pulis, militar, politiko, custom, o yanong trabahanti, masubornohan pagpalusot sa drugas.

Ikaduha, diha sa pamilya gyud unta sugdan kining maayong gawi pag-ila sa dautan ug maayo. Dako og responsabilidad ang ginikanan pag-agak sa ilang kabataan. Kon walay maayong pondasiyon ang pamilya, seguradong katag sab ang dagan sa ilang kabataan. Apan, kon gipasantop ang maayong pagtulon-an sa panimay, imposibli nga dunay adik sa pamilya.

Ikatulo, ang simbahan ug eskwelahan dunay dakong kaakohan unta sa pagduso sa insaktong pagtulon-an aron ikampaniya ang dautang resulta sa drugas.

Ang dakong pangutana gihimo ba kini sa maong mga institusiyon.

Ikaupat, kining kagahog sa bahandi ug walay pagkatagbaw mao kana ang magtukmod sa tawo paghimo og lakang bisan makadaot basta lang matuman iyang kahigwaos ug kalibutanong katagbawan.

Kon saligan nato ang gobiyerno paglimpiyo sa komunidad gikan sa drugas dili ta makapaabot og hingpit nga sulosiyon. Kinahanglan kini og panaghiusa ug tingub nga paghugpong sa tanan.

Apan, wa ba mo makugang nganong wa kaayo hisguti kon unsa ilang programa batok sa ginadiling drugas kining mga kandidato, labi na kining nagpapili pagka-senador?

Nasabtan nato kon kining mga kandidato sa administrasiyon dili mohisgut bahin sa kampaniya sa drugas kay kabahin na kana sa ilang programa.

Atong gipaabot unta nga mangugat ang mga kandidato sa oposisyon pagpabarog sa ilang program batok sa drugas. Hangtod karong panahona wala tay madungog gikan kanila.

Busa, kon moabot ta sa punto nga mahimong Mexico ang Pilipinas, ayaw ninyo basola si Duterte. Pangutan-an ang simbahan, ang eskwelahan, ang inyong ginikanan, ang mga kandidato, ug kining mga kurakot nga opisyal sa gobiyerno.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph