ANAA sa 960 ka pamilya nga mga informal settler ang makapahimulos sa housing program nga gitakdang tukoron sa duha ka mga barangay sa dakbayan sa Cagayan de Oro aron nga matubag ang ilang panginahanglanon.
Anaa sa 51,000 ang natalang mga informal settler sa dakbayan nga nanginahanglan og luwas ug barato nga pinuy-anan isip tubag niini hinungdan nga gipahigayon ang pinirmahay sa memorandum of agreement tali sa lokal nga kagamhanan sa dakbayan ubos sa administrasiyon ni Mayor Oscar Moreno, Housing and Land Use Regulatory Board (HLURB) ni manlalaban Lloyd Christopher Lao, commissioner; Social Housing Finance Corporation (SHFC) manlalaban Arnolfo Ricardo Cabling, president kauban usab ang mga developer sama sa Vistaland group Cynthia Javares, Chief Operations Officer (COO), Bria homes, Rizalito Rosales, COO ug lawyer Cecilia Ramilo, vice presidente sa Vistaland groups.
Matud ni Engr. Ermin Stan Pimentel sa City House Urban Development, nga kini usa sa mga proyekto sa lokal nga kagamhanan sa dakbayan ug kini nga proyekto alang sa mga nanimuyo sa mga delekadong lugar sama sa mga tulay, daplin sa suba, kadalanan ug uban pa.
“Gawas sa piso-piso ug Sendong kani mo venture na gyud ta og dako nga project, kani siya nga proyekto this is an engagement in a normal situation dili bagyo, dili disaster but rather attending to the backlog that we have in the city pertaining to the informal settlers families,” matud ni Pimentel.
Samtang matud usab ni Moreno nga kini ang resulta sa pagtinabangay alang sa pagserbisyo sa katawhan hinungdan nga mapasalamaton kini sa tanang mga partner niining maong proyekto.
“Salamat sa HLURB, SHFC, sa Duterte Administration for ensuring that something is done to address a need na talagang kailangan na masagot, dami ng public services but the most difficult is housing,” matud ni Moreno.
Gidugang pa ni Moreno nga kung mahimo masugdan na kini dayon ug kung maigo sa election ban mangayo kini og eksemsiyon ilabi na nga angayang masugdan na kini dayon. Giingong mokabat pa usab sa mga anaa sa usa ka tuig ug tunga ang land development.
Nagpasalamat usab ang mga benepisyaryo niining maong programa nga wala matud kini pasagdi diin giingong natuman na ang dugay na nga gipangandoy ug gi-ampo nga barato nga panimalay nga anaa lamang sa P1,500 ang matag bulan.
“Wala gyud sila nagpasagad, nagahatag gyud sila og panahon nagpasalamat gyud ko sa Ginoo ang akong pag-ampo natuman na gyud, affordable ra gyud siya kaysa uban,” matud sa usa sa mga nakabenepisyo.
Nasayran nga gitakdang tukoron ang maong housing program sa Barangay Balubal nga dunay 46,000 square meters nga yuta alang sa maong mga benepisyaryo. Kini dunay duha ka andana diin anaa usab sa 24 ka unit.
Kini maong programa nga Building Adequate, Livable, Affordable and Inclusive Filipino Communities gipaila sa tuig 2019 sa HULRB diin partnership program sa dakbayan nga tukoron sa Barangay Balubal ug Lumbia.