GIPANGITA sa lokal nga kagamhanan sa dakbayan ang bahin nga milyones gikan sa Cagayan de Oro Water District, ilabi na nga daghan ang nagkinahanglan og tubig karong mga panahona tungod sa nasinati nga kainit sa panahon.
Matud ni Kagawad Edna ‘Inday’ Dahino, tsirman sa komitiba sa Finance, nga ang mga income generating nga mga ahensiya angayang maghatag og buhis ug dunay resolusyon nga gimugna ang lokal nga kagamhanan sa dakbayan nga imbes usa ka porsyento sa kitaon niini matag tuig gihimo na lamang kini nga P6 milyones niadtong tuig 2006.
“We can compute from 2006 to 2019 that is equivalent to 13 years and that is equal to P78 million more or less, so where are these projects? Where is the money? So asa man? Naa rana sa water district or what?” matud ni Dahino.
Giingon usab ni Dahino nga angay masayod ang COWD nga seryoso ang dakbayan nga pangitaon ang sa dakbayan.
“We would like to really demand not only requesting but demanding nga ato gyud nga ipabati sa water district nga the 18th council is really serious enough nga magpangita sa ila asa na ang ilang dapat nga ihatag sa dakbayan nga kumbaga bahin,” dugang niini.
Gidugang pa niini nga ilang hatagan og sumon ang COWD ilabi na nga kung dili kini makahatag og klaripikasiyon kung asa nakapaingon ang maong dakong kantidad matag tuig ilabi na nga nakasinati na og ting-init ug naglisod na ang katawhan.
“If ever that they cannot give, we will really summon them to clarify all this things, as soon as possible because people are really craving, gapangayo na gyud tubig especially nga ting-init karon wala na gyud silay maadtoan. Tawon nag antos sila sa mga mahal kaayo nga tubig karon,” dugang niini.
Samtang ubay-ubay usab sa mga residente sa Pag-asa, Camaman-an ang nibutyag nga sulod sa pila ka tuig diha lamang sila nagsalig sa mga deep well hinungdan nga nidangop sa lokal nga kagamhanan sa dakbayan.