Hubo nga hulagway gi-post sa Facebook

GI-POST sa usa ka lalaki sa social media ang hubo nga hulagway nila sa iyahang babayi nga uyab tungod dili kini mosugot nga bulagan niini.

Niadtong Marso 24 nidangop sa Police Station 5 sa Macabalan ang 40 anyos nga babaye aron ireklamo ang iyang 33 anyos nga uyab nga residente sa dakbayan sa Cagayan de Oro.

Gibutyag ni Senior Police Officer 4 Terencio Virtudazo nga niadtong Marso 19, buot makigbulag ang babaye sa iyang uyab apan wala kini misugot ug nanghulga nga kong dili makigbalik iyang i-post sa social media ang ilang mga hubo nga hulagway.

Tungod sa desisyon sa babaye nga dili na makigbalik na-post gyud ang mga hubo nga hulagway ug nibahad na usab ang lalaki nga i-post pa ang ilang sex video hinungdan sa kabalaka sa babaye.

“Nahimo gyud na post gyud, gi-tag pa niya to ang pangalan sa babaye, nakita gyud mao tong nagdecide ang babaye nga mosumbong sa pulis para maundang pero kung dili na gyud iya mobalik e-post na gyud daw ang sex video nila,” matud ni Virtudazo.

Gidugang pa nga naabuso na ang babayi ilabi na nga kung mahuman na kini og pakigtagay sa lawasnong kalipay luguson pa siya niini.

“Abuso na kayo og mahuman na isa, manglugos pa man gyud daw kuno naa pay next round mao to naka decide siya nga makigbulag na gyud,” dugang niini.

Ang maong suspek mag-atubang sa kasong paglapas sa cybercrime ug Republic Act 9262 o Violence Against Women and Children’s Act.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph