Diputado: Mayora nga durugista

DAGHAN pa diay ang nahilambigit sa ginadiling druga.

Human gipagawas ni PRRD ang mga pangalan sa 46 ka mga politiko nga nahilambigit sa druga, aduna pa diay mga nagsunod nga mga pangalan.

Ang mga dugang 20 ka mga politiko padayon pa nga gi-imbistigar sa DILG.

Pagka-thrilling, matod pa usa ka tigpaniid.

Thrilling sa mga tawo nga segurado nga way apil.

Apan sa mga tawo nga nagduda nga naapil sila, hadlok paminawon nga duna pa diay nagsunod nga mga pangalan.

Sama sa usa ka babaye nga mayor.

Sa unang panahon, gidudahan kini siya nga nahilambigit sa druga.

Ngano man?

Tungod kay kalit lang kaayo nasapian bisan way klaro nga negosyo.

Apan sa kadugayan, nahibaw-an na gyod ang iyang pagkahilambigit sa druga.

Giunsa man pagka-diskubre?

Dihay higayon nga dihay salo-salo sa panimalay sa maong mayora.

Daghang mga bisita nga gipang-imbitar sa mayora.

Dakong kahingangha sa mga bisita nga mao pay pagka-sulod sa panimalay sa mayora.

Harianon kini og pang-dato gyod ang mga muwebles niini.

Usa sa gi-imbitar usa ka politico.

Human sa salo-salo, gilingaw ang mga bisita sa inom-inom og mahalon nga mga imnonon.

Gitawag sa mayora ang bisita nga politiko og gidala sa usa ka lawak.

Sulod sa maong lawak, misiga ang mata sa bisita kay dihay gihatag kaniya ang mayora.

Wala niya ma-klaro ang gisulti niini mao nga gitan-aw lang niya ang diha sa kamot sa mayora nga gusto ihatag ngadto kaniya.

Unsay diha sa kamot sa mayora?

Polbos, og sa mga batan-on pa, shabu.

Nasabtan sa bisita ang gusto mahitabo sa mayora – hatagan siya og shabu aron iyang gamiton.

Way tingog-tingog nga migawas ang bisita sa lawak og dali nga migawas sa panimalay sa mayora.

Sukad niadto, naglikay na ang bisita nga mopaduol sa maong mayora.

Tiaw bay kalma lang kaayo kini nga mihatag kaniya og shabu nga daw anad na kaayo kini sa maong buhat.

Mao kadtong higayona nga nagsugod na pagkalat ang balita sa mga gipanghimo sa mayora.

Dili lang diay kay ang maong bisita lang ang gihimoan sa mayora niini. Daghan pa diay nga mga bisita ang gihimoan sa mayora.

Ang uban migamit ug ang uban sab dali nga mibalibad.

Bantog rang dali ra nadato ang maong politiko, matod sa usa ka tigpaniid.

Allergic na sa mga balita nga dunay politiko nga nahilambigit sa druga nga ibulgar ang Presidente ang maong mayora.

Mao kini hinungdan nga naningkamot gyod ni siya nga makaduol ni PRRD aron maseguro nga makita siya nga nagtapad sila aron moingon ang mga tawo nga wala siyay labot sa maong lista.

Karon nga dunay dugang mga pangalan diay, daghan ang nagtuo nga gihubag-hubagan na sab ang maong mayora.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph