SA IYANG desisyon nga mobiya sa Pilipinas aron ipadayon ang paggukod sa iyang pangandoy nga makaduwa sa National Basketball Association (NBA), daghan ang nag-ampo, nagdasig ug nagsuporta sa batan-ong higante nga si 7’2” Kai Sotto.
Apan ang labing mahinungdanon seguro nga pagdasig nga nadawat sa 16 anyos nga basketbolista mao ang gikan sa mga nag-una kaniyang mingsuway pagpanimpalad sa gawas sa nasod alang sa tinguhang mahimong labing unang Pinoy nga makaduwa sa NBA.
Gipangtumbok mao sila si Japeth Aguilar, Bobby Ray Parks, ug Kiefer Ravena nga pulos nangapakyas sa pagkab-ot sa dakong ambisyon.
Si Aguilar mibiya sa nasod niadtong 2007 aron moduwa sa Western Kentucky. Nakasulod siya sa NBA D-League human gipili siya sa Santa Cruz Warriors sa 7th round isip 109th overall sa 2012 league dratf.
Apan wala nakapirma og kontrata si Aguilar sa Santa Cruz ug igo lang kining miduwa sa team isip practice player. Nibalik siya sa nasod niadtong 2013.
Turno na sab ni Parks niadtong 2015 NBA D-League Draft diin napili siya sa Texas Legends sa 2nd round isip 25th overall.
Nakaduwa siya og usa ka season sa Legends diin nag-average siya og 4.6 puntos ug 1.9 rebounds sulod sa 32 ka mga duwa.
Apan wala gihapon nakasulod sa NBA si Parks ug mibalik na lang kini sa nasod.
Unya si Ravena mipirma isip developmental player sa Texas Legends apan sama ni Aguilar, wala kini nakaduwa sa NBA D-League.
Taliwala sa ilang kapakyasan, ang tulo pulos ningdasig kang Sotto nga ipadayon ang pagkab-ot sa pangandoy apan ilaha kining gipahimangnuan nga dili sayon ang maagian niini.
Ang tulos pulos miingon nga sakto ang desisyon ni Sotto nga mobiya sa Pilipinas aron dawaton ang tanyag sa teams sa Europe ug hasta sa Amerika.
“Go for it. Even if I had a son, I would tell him go to the States. If that’s his dream of making it to the NBA," asoy ni Parks sa interbyu sa Spin.ph. (ESL)