NAGLAWIG ang Ocho Direcho sa kaparutan sa umaabot nga eleksiyon sa Mayo. Kini kon ipasikad sa mga nasudnong survey sa Pebrero.
Apan ang mga pro-Ocho di motuo. Ang mga pro-Duterte naghikab-hikab ang pagtuo sa ilang kadaugan diin di malarawan ang mga pahiyom.
Kining lindog nagtuo nga ang way gidapigan nga survey usa ka benchmark. Usa ka pointing guide sa umaabot nga mogabay sa mga kandidato.
Kining survey sa nahimutangan sa mga nasudnong kandidato nakasandig sa kahimungawong o pagkaila sa tawo sa ngalan ug apelyido (name-recall)..
Si Mar Roxas ray nakasud sa magic 12. Si Roxas katulo na modagan sa nasudnong piniliay. Ilado ang apelyidong Roxas kay sa Hilbay, Diokno ug Tanada.
Tinuod, ilado ang apelyidong Diokno ug Tanada sa mga nag-edad 60 ngadto 80 anyos kay nakaabot nilang Jose Diokno ug Lorenzo Tanada ang mga banggiitang senador niadto.
Nakaila bang mga batan-on labi na ang mga milenyals kanila? Kon may nakaila maihap lang sa mga tudlo. Kadto rang himasag political history sa nasod.
Ang mga kandidato nga gustong makasud sa magic 12 nagkinahanglag estratehiya nga makabunlot nila sa itaas aron makaampad nilang Poe, Villar, Angara o kaha kang Binay.
Si Roxas nga kanunayng iwit sa survey sa miaging presidential elections maoy nakigtakos ni Digong sa katapusang awa
Gikinahanglan tag oposisyon sa senado aron di magunitan ang liog niini sa palasyo. Buhion ang demokrasya sa mga sanga sa kagamhanan.
Ang mga banggiitang kawatan sa kaban sa nasod nga gustong mamalik sa senado maoy angayng babagan sa atong mga boto.
Di ang Ocho Direcho nga way rekord sa pangawat, pangurakot ug panulis sa buhis sa katawhan. Tagiktik na sad ang nasod kon manaog ang mga kawatan nga bagag nawong.