DILI ikalimod nga daghang namatay tungod sa nagpadayong gubat sa administrasyon ni Presidente Rodrigo Duterte batok sa pagkuyanap sa gidiling druga labi na sa shabu. Maghilak ang adlaw kon way duguong panghitabo tungod sa makanunayong operasyon sa awtoridad.
Mismo ang kagamhanan niangkon nga dili kalikayan nga dunay duguong mahitabo. Dili lang awtoridad ang dunay armas. Ang mga sindikato armado usab. Usahay gani mas taas pa og kalibre ang ilang armas kon itande sa kapulisan. Dili lang suspek, may kinabuhi usab sa awtoridad nga nakalas.
Ang human rights groups ug mga kontra sa pulitika sa administasyon, kanunay nagbasol sa kagamhanan nga hinungdan sa duguong panghitabo. Apan wala nila gibahig ang akusasyon. Bisan kadtong patay nga resulta sa away tali o sud sa sindikato napahid o naihap sa kampanya sa kagamhanan, apan nag-unay lang diay sa ilang ilegal nga negusyo.
Busa sa nagkadugay ang sitwasyon, nabahin ang publiko. Dunay dili gusto sa patay apan batok sa druga. Dunay uyon sa patay tungod sa kalagot sa druga human naapektohan sa mga linuog nga krimen nga binuhatan sa naulipon sa gidiling druga. Dunay supak tungod lang sa pulitika. May nagbarog kaha nga supak sa patay apan uyon sa ilegal nga druga? Klaro nga habig kini sa sindikato.
Ikaw, asang bahina mihaom?
Tinuod, ang patay nahisama na lang sa ordinaryong bahin sa adlaw. Hinuon, dunay pagminus sa mga adik o may kahadlok na ang pagyuhot sa druga. Nigamay ang kalibotan sa sindikato. Kay sa druga, ang kaugalingon gipatay usab sa hinayhinay. Mapagana pa ang kinabuhi sa uban tungod sa ilang binuhatan.
Busa sa isyu sa gidiling druga ug ang kaso sa patay--pareho, walay kapilian. Mag-ampo kita. Mahunong na ang pag-abuso sa druga. Tahuron ang kabililhon sa kinabuhi sa tawo.